16 октябр куни бўлиб ўтган телефон суҳбатида Россия президенти Владимир Путин Америка президенти Доналд Трампни Украинага Tomahawk туридаги қанотли ракеталарни етказиб бериш оқибатларидан огоҳлантирди. Бу ҳақда Кремл ёрдамчиси Юрий Ушаков маълум қилди.
Унинг сўзларига кўра, Путин суҳбатда «Tomahawkʼлар жанг майдонидаги вазиятни ўзгартирмайди, аммо Москва ва Вашингтон муносабатларига жиддий зарар етказади», деган фикрни яна бир бор такрорлаган. Шунингдек, у бундай қадамлар тинчлик музокаралари истиқболини ҳам хавф остига қўйишини таъкидлаган.
Доналд Трамп эса Москванинг позициясини инобатга олишини ва бу масалани 17 октябр куни Вашингтонда Украина президенти Володимир Зеленский билан муҳокама қилишини билдирган. Трамп аввалроқ ҳам «агар Россия урушни тўхтатмаса, Киевга Tomahawk ракеталарини юбориш ҳақида ўйлаётгани»ни айтганди.
Путин бу масала бўйича аввал ҳам кескин фикр билдирган. 5 октябрь куни у Украинага Tomahawk етказилиши «Россия ва АҚШ муносабатларига рахна солиши»ни айтган, 3 октябрь куни эса буни «эскалациянинг янги босқичи» деб атаган эди. Унинг сўзларига кўра, бу ракеталар Россия хавфсизлиги учун жиддий таҳдид солади.
Financial Times манбалари маълум қилишича, агар Трамп розилик берса, АҚШ Украина қўшинларига Tomahawk ракеталарини Россия ҳудудидаги стратегик объектларга йўналтиришда ёрдам бериши мумкин. НАТО манбалари эса Москва бу ҳолатга «қатъий риторика ва ядровий таҳдидлар билан жавоб бериши эҳтимоли»ни билдиришди.
ISW (Урушни ўрганиш институти) маълумотларига кўра, Tomahawk ракеталарининг учиш масофаси 1,6–2,5 минг км.ни ташкил этади. Бу эса Киевга Россия ҳудудидаги қарийб 2 мингга яқин ҳарбий объектни назорат остида ушлаш имконини беради, бу эса Россиянинг таъминот ва ҳужум операцияларини жиддий қийинлаштириши мумкин.