Германия канцлери Фридрих Мерц Трамп ва Зеленскийнинг 17 октябр куни Вашингтонда бўлиб ўтган учрашувини шарҳлар экан, ташриф «Зеленский истаганидек ўтмади», деб баёнот берди. Унинг фикрича, бу воқеа Украинага Европа ёрдами қанчалик зарур эканини яна бир бор кўрсатди.
«Бу ташриф — Зеленский хохлаган натижа эмас. Учрашув шунни кўрсатдики, Украинага ёрдам бериши керак бўлган асосий куч — бу Европа Иттифоқидир», — деган Мерц N-TV телеканалига.
У Германия расмий Киевни «молиявий, сиёсий ва ҳарбий жиҳатдан» қўллаб-қувватлашни давом эттиришини таъкидлади.
Трамп ва Зеленскийнинг музокараси икки соатдан ортиқ давом этган. Очиқ қисмида АҚШ президенти Москва ва Киевни «дескалацияга эришиш учун қўшма саъй-ҳаракатларга чақирган».
Axios манбаларига кўра, Трамп аниқ баёнот берган: Вашингтон ҳозирча Киевга узоқ масофали Tomahawk ракеталарини етказиб бериш ниятида эмас.
Манбалардан бири суҳбатни «мураккаб», иккинчиси эса «совуқ ва эҳтиросли» деб таърифлаган. «Ҳеч ким бақирмади, лекин Трамп ўз сўзида жуда қаттиқ турди», — деган биринчи манба.
Учрашувдан сўнг Трамп Truth Social’да баёнот ёзди:
«Фронт чизиғида етарлича қон тўкилди. Улар тўхташлари керак. Ҳар икки томон ҳам ўзини ғолиб деб эълон қилсин, тарих ҳукм чиқаради. Бошқа отишмалар, ўлимлар ва исроф йўқ. Бу уруш мен президент бўлганимда ҳеч қачон бошланмасди», — деди у.
Зеленский журналистларга берган баёнотида учрашувни «самарали» деб баҳолади, аммо ракеталар бўйича оптимизм билдирмади: «Мен реалистман. Биз «Tomahawk» ҳақида гаплашдик, лекин АҚШ кескинликни оширишни истамаяпти».
Манбаларнинг таъкидлашича, Трамп Украинага узоқ масофали Tomahawk ракеталарини беришдан бош тортган, гарчи Зеленский бу масалада қаттиқ туриб олган бўлса ҳам. CNN манбалари ҳам бу маълумотни тасдиқлаб, Трампда «Киев урушни узайтириш ва кескинликни кучайтиришга мойил», деган таассурот қолганини билдирган.