Украина президенти Володимир Зеленский жума куни Вашингтонда бўлиб ўтган учрашувда Доналд Трампга янги келишув таклиф қилди: Киев АҚШга минглаб украин дронларини бериши, эвазига эса Tomahawk қанотли ракеталари ва бошқа қурол-яроғ олиши мумкин. Бу ҳақда BBC хабар берди.
«Замонавий урушлар катта миқдорда дрон талаб қилади. Уруш фақат «Tomahawk»лар эмас — бу минглаб учувчисиз аппаратлар. Биз уларни ишлаб чиқарамиз. АҚШда бошқа турдаги ракеталар кўп, лекин биздаги каби минглаб дронлар йўқ. Биз дронлар бўйича жиддий таклиф бердик», — деди Зеленский.
Доналд Трамп бу таклиф ҳақидаги саволга жавоб бериб шундай деди: «Ҳа, шундай йўл тутишимиз мумкин. Бизда ҳам ҳозир кўп дронлар бор, ўзимиз ҳам ишлаб чиқарамиз, бошқа давлатлардан ҳам сотиб оламиз. Мен украин дронларига қизиқяпман — улар жуда яхши аппаратлар. Бу уруш туфайли сўнгги йилларда дронлар асосий қуролга айланди», — деди Трамп Reuters агентлигига.
Америка президенти шунингдек, Украинага Tomahawk ракеталарини бериш масаласи икки давлат раҳбарлари учрашуви кун тартибида борлигини тасдиқлади. «Биз бу ҳақда гапирамиз. Бу ҳақиқатан эскалация бўлади, лекин муҳокама қилиниши керак бўлган масала», — деди Трамп, Украинага Россия ҳудуди ичкарисига узоқ масофали зарбалар бериш рухсати ҳақидаги саволга жавоб бера туриб.
Трампнинг таъкидлашича, Tomahawk — жуда кучли ва аниқ қурол бўлиб, уларнинг ўзига ҳам керак эканини унутмаслик керак. «Умид қиламанки, уларга бу қурол керак бўлмайди. Биз урушни «Tomahawk»ларсиз тугатишга умид қиламиз. Биз фақат битта нарсани хоҳлаймиз — урушнинг тугашини», — деди АҚШ президенти.