Яқинда UzAuto Motors компанияси Chevrolet Cobalt’нинг янгиланган версияси нархларини эълон қилди. Янги модел салон қулайлиги ва технология жиҳатидан олдинги авлодлардан анча устун бўлиб, савдолар 3 ноябрдан бошланиши белгиланган.
Шу билан бирга, ҳайдовчилар янги автомобил сотиб олмасдан, ўзидаги Cobalt’ни устахонада замонавий кўринишга олиб чиқиш имконига эга. Муттахассислар ҳисоб-китобига кўра, бундай янгиланиш учун керакли тюнинг тўпламининг умумий қиймати ўртача 900 долларни ташкил этади.
Бу нархга Tracker 1 услубидаги янги асбоблар панели (300 доллар), Apple CarPlay ва Android Auto функцияларига эга MyLink сенсорли мултимедиа тизими (400 доллар), круз-контрол ва рулдаги бошқарув тугмалари (100 доллар), ҳамда олд ўриндиқлар иситгичи (100 доллар) киради. Ушбу жиҳозлар салонни нафақат визуал, балки техник жиҳатдан ҳам замонавий қилади.
Муттахассислар бундай ўзгаришларни фақат тажрибали усталар орқали амалга оширишни тавсия этади, чунки нотўғри ўрнатиш ёки дастурий хатоликлар автомобил тизимига жиддий зарар етказиши мумкин.
Компания маълумотига кўра, янги Cobalt икки турдаги комплектацияда сотувга чиқади:
Cobalt Style MCM — 156,1 миллион сўм,
Cobalt Midnight MCM — 165,2 миллион сўм.
Шу билан бирга, аввалги моделлар ҳам ҳозирча ўзгаришсиз нархларда — 147,9 ва 155,2 миллион сўмдан таклиф этилмоқда (https://vaqt.uz/2025/10/15/3-noyabrdan-cobalt-avtomobili-uchun-kontraktaciya-ochiladi/).