Трамп: «Tomahawk ўзимизга ҳам керак» — Украина, Россия ва Хитой ҳақида

23:06 | 4 дақиқада ўқилади.

АҚШ президенти Доналд Трамп Fox News телеканалига берган интервюсида Украинага Tomahawk ракеталарини бериш эҳтимоли, Россия билан тинчлик музокаралари ва Хитой билан савдо муносабатлари ҳақида фикр билдирди.

Trump fox news1

АҚШ президенти Доналд Трамп Украинага узоқ масофали Tomahawk ракеталарини бериш масаласи ҳали муҳокама қилинаётганини тасдиқлади. Унинг сўзларига кўра, Россия билан можарони ҳал этиш жараёнида Владимир Путин «Украинанинг айрим ҳудудларни ўзида сақлаб қолиши мумкин».

Fox News телеканалидаги Sunday Morning Futures дастурига берган интервюсида Трамп етакчи Мария Бартиромо саволига жавоб бериб шундай деди:

«Путин маълум бир нарсани олади — чунки у аллақачон маълум ҳудудларни эгаллаган».

Шу билан бирга, Трамп Россия билан тинчлик музокараларига эришиш мумкинлигига ишонч билдирди:

«Бу осон эмас, лекин бизда савдо ва ҳамкорлик учун улкан имкониятлар бор. Барчаси муваффақиятли тугашига умид қиламан».

Tomahawk қанотли ракеталарининг Украинага бериш эҳтимоли ҳақида Трамп шундай деди:

«Биз Украинага барча қуол-яроғларимизни бера олмаймиз. Мен АҚШнинг ҳарбий салоҳиятини хавф остига қўя олмайман. Tomahawkʼлар АҚШнинг ўзига ҳам керак».

Хитой ҳақида гапирар экан, Трамп шундай деди:

«Хитой ҳар доим фойда излайди ва АҚШни кўп йиллар давомида алдаб келган. Мен уруш бошламайман, лекин адолатли савдо битими керак».

У Хитой маҳсулотларига 100 фоизлик тариф жорий этиш иқтисодиёт учун оғир бўлиши мумкинлигини айтди, аммо «Пекин шундай қадамга мажбур қилганини» қўшимча қилди. Трамп икки ҳафтадан кейин Си Жинпинг билан бўлиб ўтадиган учрашув натижалари савдо муносабатларининг келгуси йўналишини белгилашини таъкидлади.

Ғазо масаласига тўхталар экан, Трамп шундай деди:

«Агар ҲАМАС қуролини ихтиёрий топширмаса, бошқа кучлар уни қуролсизлантиради. Аммо АҚШ ҳарбийлари Ғазога кирмайди».

АҚШ президенти сўзларига кўра, АҚШнинг бу йўналишдаги иштироки фақат «Тинчлик кенгаши» орқали амалга оширилади ва мамлакат «у ерда уруш эмас, барқарор бошқарув учун ёрдам беради».