The Economist ҳисобларига кўра, Россия армиясининг ҳозирги ҳужум суръати сақланиб қолса, Луганск, Донецк, Херсон ва Запороже областларини тўлиқ эгаллаш учун 2030 йил июнигача жанг ҳаракатларини давом эттириши, бутун Украинани забт этиш учун эса яна 103 йил керак бўлади.
Нашрнинг баҳолашича, жорий йилнинг майида Россия фронтда кенг кўламли ҳужумни бошлаганидан бери Украина ҳудудининг атиги 0,4 фоизини эгаллаб олган ва бирорта ҳам жиддий мақсадга эришмаган. Шундай кичик илгарилаш учун жуда катта нарх тўланган. Нашр ҳисоб-китобларига кўра, кенг кўламли босқин бошланганидан то жорий йилнинг январигача Россия армияси 640-877 минг аскарини йўқотган, улардан 137-228 минг нафари ҳалок бўлган. 13 октябрга келиб, бу рақамлар деярли 60 фоизга ошиб, 984 мингдан 1,438 миллионга етган, шу жумладан 190-480 минг киши ҳалок бўлган.
Умуман олганда, 2022 йил октябрда Украинанинг биринчи қарши ҳужуми тугаганидан кейин фронт чизиғи сезиларли ўзгармаган. Нашрнинг таъкидлашича, кўп сонли қўшинларни бир жойга тўплай олмаслик туфайли Украина мудофаа чизиқларининг тўсатдан ёриб ўтилиши эҳтимолдан йироқ. Россия бундай тактика билан фақат секин суръатларда ҳужум қилиши мумкин. «Уч йиллик муваффақиятсиз ҳужум операцияларидан сўнг, тўсатдан қулаш Украина мудофаа чизиқларидан кўра Россия ҳарбий иқтисодиёти учун эҳтимоли юқорироқ бўлиши мумкин», – дея хулоса қилган «The Economist».
Россия президенти Владимир Путин Украинадаги урушни тугатиш учун Донбасснинг босиб олинмаган қисмлари, шунингдек Запороже ва Херсон вилоятларидан Украина қўшинларини олиб чиқишни очиқ талаб қилган. Кейинчалик у АҚШ президенти Доналд Трамп билан музокаралар чоғида Донбассни Россияга тўлиқ топшириш эвазига Запороже ва Херсон вилоятларидаги фронт чизиғини музлатиб қўйишга рози бўлган.
The Washington Post манбаларига кўра, Москва ҳамон Киевдан бутун Донбассни талаб қилмоқда, аммо энди бунинг эвазига Запороже ва Херсон вилоятларининг бир қисмидан воз кечишга тайёр.
Украина президенти Владимир Зеленский Украина қўшинларининг Донбассдан чекинмаслиги ҳақида айтган. У бундай қарорни «қабул қилиб бўлмайдиган» деб атаган, шунингдек, Украина ва Россия уруш тугашига яқинлашиб қолганини таъкидлаган. АҚШ президенти Доналд Трамп Вашингтонда украиналик ҳамкасби Владимир Зеленский билан музокаралардан сўнг ҳозирги фронт чизиғида жанг ҳаракатларини тўхтатишни ва кейинроқ тинчлик ҳақида келишиб олишни таклиф қилган. Бироқ Кремл Трампнинг бу таклифини рад этган.