Тошкент вилоятининг Чирчиқ шаҳрида 33 ёшли маҳкум томонидан такроран жиноят содир этилгани маълум бўлди. Бу ҳақда «Миллар» кўрсатуви хабар берди.
Тергув маълумотларига кўра, у «Lacetti» ҳайдовчиси йўлда машинани носозлик сабаб тўхтатганидан фойдаланиб, ёрдам бермоқчи бўлганини айтган ва рулга ўтиргач, транспорт воситасини ўғирлаб кетган.
Машина ичидаги пул ҳамда бошқа қимматбаҳо буюмларни эгаллаган жиноятчи кейинчалик автомашинани яқин атрофдаги мактаб ёнида ташлаб кетган.
Маълумотларга кўра, 1992 йилда туғилган бу шахс олдин ҳам олти марта жиноий жавобгарликка тортилган. Жиноят содир этилган пайтда у манзил колониясида жазо муддатини ўтаётган бўлиб, маъмурият буйруғи билан бошқа бир манзилга ишлаш учун ўтказилган.
Ўша ерда у бошқа бир ишлаётган аёл билан танишиб, ишқий муносабат бошлаган ва биргаликда қочиб кетишга қарор қилишган. Қочоқлар уй-жой топишга уринишган, аммо омадсизликка учрагандан сўнг яна ўғирлик йўлига қайтишган.
Суд материалларига кўра, айбланувчи Ўзбекистон Республикаси Жиноят кодексининг 169-моддаси (Ўғирлик) ва 267-моддаси (Автомототранспорт воситасини олиб қочиш) бўйича айбдор деб топилган ва 12 йил муддатга озодликдан маҳрум қилиш жазоси тайинланган.