Ижтимоий тармоқларда тарқалган хабарларга кўра, журналист Рухсора Бобоқулова Навоий шаҳридаги заҳарли тутун ҳақида жонли эфирда очиқ гапирганидан сўнг унга нисбатан босим бўлгани ва вилоят телерадиоканалида жонли эфирлар тўхтагани ҳақида даъволар илгари сурилди.
Бу бўйича Навоий вилояти ҳокимлиги Ахборот хизмати расмий баёнот билан чиқди. Унда қайд этилишича, 23 июл куни телерадиоканал студиясида LED экран ўрнатиш ва жиҳозлаш ишлари олиб борилгани туфайли жонли эфирлар вақтинча тўхтатилган.
24 июл куни соат 18:00да “Очиқ мулоқот” ва 25 июл куни “Ассалом, Янги кун!” дастури 8:00дан 10:00гача жонли эфирда узатилган. Бу ҳолат, ҳокимлик таъкидича, техник жиҳатлар билан боғлиқ бўлиб, цензура ёки босим сифатида баҳоланмаслиги лозим.
Рухсора Бобоқуловага нисбатан ҳеч қандай тазйиқ бўлмагани ва у ўз ижодий фаолиятини режа асосида давом эттираётгани таъкидланди. У ҳафтанинг сешанба ва пайшанба кунлари жонли эфирда бошловчилик қилмоқда.
Ҳокимлик Facebook’dаги расмий саҳифасида ҳам видеобаёнот эълон қилганини билдирган. Расмий баёнотда сўз эркинлиги ва ошкоралик тамойиллари доимо қўллаб-қувватланиши қайд этилган.