БМТ Хавфсизлик кенгашининг 25 июл куни бўлиб ўтган йиғилишида АҚШнинг вақтинчалик доимий вакили Дороти Ши Россияни тинч аҳолига қарши уюштирилган ҳужумларда айблади. Унинг сўзларига кўра, Россия мактаблар, болалар майдончалари ва кексалар уйларини ракета ва дронлар билан йўқ қилмоқда.
Шунингдек, у Россия КХДРдан минглаб аскарларни жалб қилганини ва ўзининг юз минглаб фуқаросини фронтда ҳалок бўлишга юборганини таъкидлади. У 14 июл куни Доналд Трамп Россия президенти Владимир Путинга урушни 50 кун ичида тўхтатиш бўйича шарт қўйганини эслатди.
АҚШ вакилига кўра, Россия ҳужумларни тўхтатмаса, Вашингтон қўшимча чоралар кўришга тайёр. Бу эслатма Трамп ултиматумининг расмий ва халқаро платформалардаги биринчи очиқ тасдиғи бўлди.
Ши БМТ Хавфсизлик кенгаши 100 кундан зиёд аввал қабул қилган резолюция — Украинани зудлик билан тинчликка олиб келиш чақирувига ҳам тўхталиб, бу жараён Саудия Арабистони ва Истанбулдаги музокараларга туртки берганини, бироқ ҳақиқий натижалар ҳали кузатилмаётганини таъкидлади.
Шу билан бирга, Ши Хитойни танқид остига олди. Унинг сўзларига кўра, Пекин экспорт назорати ҳақидаги баёнотларига қарамасдан, Россия дронлари ва қуролларида ҳар куни Хитойда ишлаб чиқарилган таркибий қисмлар аниқланмоқда.