Дюк университети тадқиқотчилари ишлаб чиққан «DunedinPACE-N» деб номланган тест 40 ёшда ўтказиладиган мия МРТ орқали 300 дан зиёд параметрларни таҳлил қилади — қават қалинлиги, гиппокамп ҳажми ва мия қавариқларининг ўлчами шулар жумласидан. Ушбу маълумотлар асосида инсон организмининг биологик қариш тезлиги баҳоланади.
Тадқиқот натижаларига кўра, мияси «ёши каттароқ» кўринган инсонлар 40 фоиз ҳолатда эртароқ вафот этади ва 18 фоиз кўпроқ касалликларга дучор бўлади. Аксинча, «ёшроқ» кўринган мия эгалари хотира ва фикрлаш тестларини яхши бажарган ҳамда қариш билан боғлиқ касалликлар камроқ қайд этилган.
Тадқиқотнинг кейинги босқичида 52 ёшдан 89 ёшгача бўлган 624 киши таҳлил қилинди. Улар орасида организм қариши тез кечган инсонларда деменцияга чалиниш хавфи 60 фоизга юқори бўлгани аниқланди.
Nature Aging журналида чоп этилган ушбу тадқиқот шунга далил бўлмоқдаки, инсоннинг «мия ёши» ҳар доим ҳам унинг расмий ёшини акс эттирмайди. Олимлар фикрича, мунтазам МРТ ташхиси орқали организм қаришининг эрта белгилари аниқланиб, профилактика ишлари самарали олиб борилиши мумкин.