28 июл куни бир тонна бензин нархи яна 0,5 фоизга кўтарилиб, 10,83 млн сўмни ташкил этди. Бу охирги бор нарх тушган 11 июлдан буён 8,5 фоизлик ўсишни англатади.
Йил бошидан бери бензин нархи 16,42 фоизга ошган бўлса, июл ойида ўзи 10 фоизга қимматлашди. Бундай динамика айниқса 10 июндан сўнг янада кучайди — айнан шу санадан бошлаб нархларнинг 5 фоиздан ортиқ кўтарилишига қўйилган чеклов бекор қилинган эди. Бу эса бозор механизмларини тўлиқ ишга туширди.
2024 йил ноябр ойида Рақобат қўмитаси томонидан белгилаб қўйилган нарх чегаралари ҳам бекор қилинган. Шундан сўнг бензин нархи 14,56 фоизга кўтарилганди. Аввалроқ AI-80 бензинининг бир тонналик нархи 10 млн сўмлик «психологик» даражани ошган эди.
Эксперт Отабек Бакиров Россия бензини экспорти тақиқланганини эътиборга олиб, нархлар янада ошишини башорат қилмоқда. Унинг таъкидлашича, майда импортчилар бозордан чиқиб кетиши, ички ишлаб чиқарувчилар эса нархни белгилашда катта имкониятга эга бўлиб қолиши мумкин.
Айни пайтда, Ўзбекнефтгаз 2025 йил сентябридан бошлаб AI-80 бензини ишлаб чиқаришни тўхтатиши ва юқори октанли ёқилғилар — AI-92 ҳамда AI-95 русумларига тўлиқ ўтишини маълум қилган. Президент феврал ойида AI-80 бензинидан фойдаланишни чеклаш ва халқни экологик тоза, сифатли ёқилғи билан таъминлаш юзасидан топшириқ берганди.