Туркия энергетика ва табиий ресурслар вазири Алпарслан Байрақтар 30 июль куни бир неча минтақа — Диёрбакр, Габар ва Ботманда катта миқдорда янги нефт конлари аниқланганини маълум қилди. Унинг сўзларига кўра, топилган 57 млн барреллик захиралар 4 млрд долларга тенг.
Вазирнинг таъкидлашича, денгизда олиб борилган геологик қидирув ишлари натижасида Қора денгизнинг Гўктепе-3 қудуғида 75 млрд куб метр табиий газ захираси топилган. Бу миқдор Туркиянинг 1,5 йиллик газ эҳтиёжини қоплаш учун етарли.
Байрақтар Туркиянинг нефть ва газга бўлган ташқи қарамлигини камайтириш режалари ҳақида тўхталар экан, қитъада ҳам қидирувлар фаол давом этаётганини, йил охирига қадар яна янги захиралар аниқланиши мумкинлигини билдирди. Унинг қайд этишича, айниқса Диёрбакр минтақасида 600 км² майдонда 4–6 млрд барреллик сланец нефти ва гази захираси мавжуд бўлиши мумкин.
Ушбу ҳудудда Туркия АҚШ компаниялари билан ҳамкорликда нефть қазиб чиқаришни режалаштирмоқда. Ҳозирда 24 та вертикал ва горизонтал қудуқ қазиш режаси бор. Бисмила шимолида жойлашган майдонда 350 млн барреллик нефть захираси бор деб баҳоланмоқда — бу ҳажм Габардаги конлар билан тенг.
Маълумот учун, 2024 йилда Туркия кунига 127 минг баррел нефт қазиб олган, бироқ деярли 1 млн баррелга тенг нефт ва нефт маҳсулотларини импорт қилган. Унинг импортининг катта қисми (учдан икки қисми) Россиядан олинган нефт ва нефт маҳсулотлари ҳисобига тўғри келган.