АҚШ президенти Доналд Трамп Truth Social ижтимоий тармоғидаги саҳифасида Россия–Украина уруши бўйича ўз баёнотини эълон қилди. Унга кўра, 2025 йил бошидан буён Россия 112 500 нафар ҳарбий хизматчисини йўқотган, улардан 20 мингга яқини сўнгги бир ой ичида ҳалок бўлган.
Трампнинг сўзларига кўра, Украина армияси ҳам йўқотишларга дучор бўлмоқда, бироқ уларнинг миқдори Россияникидан анча кам. Украина жангларда бедарак йўқолганларни ҳисобга олмаганда, 8 мингга яқин ҳарбий хизматчини йўқотган.
Урушда тинч аҳоли ўртасидаги қурбонлар ҳақида ҳам тўхталган Трамп, айниқса Киев ва бошқа шаҳарларга қилинган ракета ҳужумлари натижасида ҳалок бўлганлар сонини таъкидлаган, бироқ бу йўқотишларни «кичикроқ миқёсда» деб баҳолаган.
АҚШ президенти бу можарони «Байден уруши» деб атаган ва агар ўзи президент бўлганида, уруш бошланмаслигини таъкидлаган. «Бу уруш ҳеч қачон бўлмаслиги керак эди — бу Байденнинг уруши, менинг эмас. Мен буни тўхтатиш учун бу ердаман», — деб ёзди у.