Бирлашган Араб Амирликлари ҳудудида фаолият юритаётган Россия компаниялари оммавий текширувлар ва банк ҳисобларининг блокланишига дуч келмоқда. Бу ҳақда РБК ҳуқуқшунослар ва консалтинг компанияларига таянган ҳолда хабар берди. Уларнинг маълумотларига кўра, мамлакатда 4 мингдан ортиқ Россия ширкати рўйхатдан ўтган, уларнинг 20–30 фоизи банк чекловлари билан тўқнаш келмоқда.
Мутахассисларнинг таъкидлашича, ҳатто банкнинг қўнғироғига жавоб берилмаган ёки белгиланган вақтда ҳужжат юборилмаган ҳолатларда ҳам ҳисоблар ёпилмоқда. Банклар баъзан 24 соат ичида 20 тагача ҳужжатни тақдим этишни талаб қилмоқда.
БААда айниқса мамлакат билан тижорат фаолияти заиф боғланган ёки мутлақо боғланмаган компанияларга нисбатан талаблар кучайтирилмоқда. «Қонуний ва катта айланмага эга бизнеслар ҳам муаммога дуч келмоқда», — дейди Pen&Paper компанияси шериги Станислав Данилов.
Юристларнинг таъкидлашича, маҳаллий банклар халқаро санкциялар рўйхатини диққат билан кузатмоқда. Ҳисоблар фақат тўғридан тўғри санкцияга учраганларга эмас, балки «қора рўйхат»даги ҳамкорлар билан ишлайдиганларга нисбатан ҳам ёпилмоқда.
Uppercase маълумотига кўра, фақат ўтган йили БААда россиялик иштирокчиларга эга яна 100 та компания ташкил этилган. Бу 2023 йилга нисбатан 2,5 баробар кўп. Шу билан бирга, аввал рўйхатдан ўтган компанияларнинг 14 фоизи фаолиятини тўхтатган.
Энг кўп очилаётган бизнеслар савдо (26 фоиз), IT (21 фоиз) ва ишлаб чиқариш (14 фоиз) соҳаларида бўлган.