Ўзбекистон фуқароси Украинадаги урушда Россия томонидан иштирок этгани учун 4 йиллик озодликни чеклаш жазосига ҳукм қилинди. Бу ҳақда Россия ОАВ хабар берди.
Суд ҳужжатларига кўра, 24 ёшли йигит 2024 йил октябр ойида Россияга ишлаш учун борган. У Telegram орқали 150 минг рубллик маош эвазига ўрмон кесиш ишлари бўйича эълонни кўриб, унга мурожаат қилган. Тиббий кўрикдан ўтгач, у билан меҳнат шартномаси тузилган, аммо кейинчалик у ҳарбий хизмат шартномасини имзолаганини тушунган.
Кейинчалик, йигит Курск вилоятидаги фронт орқасини қўриқлаш ишларига жалб этилган. Унинг айтишича, агар жангларда иштирок этишдан бош тортса, ҳарбий полиция уни 5 йилга қамаши билан таҳдид қилишган.
2025 йил январ–феврал ойларида Суджа шаҳрида жойлашган позицияларга озиқ-овқат етказган. Шунда шамоллаб, касалланган ва шифохонага, кейин эса даволаниш учун ҳарбий лагерга юборилган.
Уни яна фронтга юборишмоқчи бўлишганида, К.С. Ўзбекистон элчихонасига мурожаат қилган. У яширин тарзда лагердан чиқиб, Москвага етиб борган ва элчихона орқали «Қайтиш гувоҳномаси» олиб, Тошкентга қайтган.
Суд жараёнида у ўз айбини тан олган, жасоратсизлик қилганини ва отасининг қарзларини тўлаш мақсадида бу ишга қўл урганини айтган. Шунингдек, у оилада ягона фарзанд эканини, пушаймонлигини билдирган, енгилроқ жазо тайинлашни сўраган.
Суд уни республика Жиноят кодексининг 154-моддаси 1-қисми бўйича айбдор деб топган ва тўрт йил муддатга озодликни чеклаш жазоси тайинланган.
Маълумот учун, Ўзбекистон Жиноят кодексининг 154-моддасига кўра, ёлланиш, яъни низолашаётган давлатнинг фуқароси ёки ҳарбий хизматчиси ҳисобланмаган ёхуд назорат қилиниб турган низолашаётган давлат ҳудудида доимий яшамайдиган ёки ҳеч қандай давлат томонидан қуролли кучлар таркибида расмий топшириқни бажариш ваколати берилмаган шахснинг моддий манфаатдорлик ёки бошқа бирон шахсий манфаатни кўзлаб, ўзга давлат ҳудудида ёки унинг тарафини олиб қуролли тўқнашувда ёхуд ҳарбий ҳаракатларда қатнашиш учун ёлланиши – 5 йилдан 10 йилгача озодликдан маҳрум қилиш билан жазоланади.
ЖКнинг 154-1-моддасига биноан, Ўзбекистон Республикаси фуқаросининг чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириши – базавий ҳисоблаш миқдорининг 300 бараваригача жарима ёки 3 йилгача ахлоқ тузатиш ишлари билан жазоланади.