2025 йил июл ойи охирида АҚШ президенти Доналд Трамп ва Россия Хавфсизлик кенгаши раис ўринбосари Дмитрий Медведев ижтимоий тармоқлар орқали ўзаро танқидий тортишувга киришди. Трамп Медведевни оғзига эътиборли бўлишга чақириб, уни «хавфли ҳудуд»га кириб бораётганликда айблади.
Жавобан Медведев Трампни «Юраётган ўликлар» филмини қайта кўришга ва «Ўлик қўл» (СССР давридаги ядровий жавоб тизими) ҳақида эслашга чақирди. Трамп эса бунга жавобан иккита атом сувости кемасини «мувофиқ минтақалар»га юборишини маълум қилди.
Кремл бу тортишувга жавобан, Россия ташқи сиёсати юзасидан аниқ баёнот берди. Президент матбуот котиби Дмитрий Песков брифингда таъкидлашича, Россияда ташқи сиёсий позицияни фақат Владимир Путин белгилайди.
«Аммо энг муҳими, шубҳасиз, бу президент Путиннинг мавқеидир. Мамлакатимизда ташқи сиёсатни давлат раҳбари, яъни Путин белгилайди», дея таъкидлади Кремл вакили.
Песков, ўз навбатида, бу вазиятни хавфли эскалация деб баҳоламади. Аммо у ядровий риторикада эҳтиёткорлик сақлашни ҳам таъкидлади. Кремл томонидан билдирилишича, бундай сўз ўйинлари ташқи сиёсатга таъсир қилмайди.