Тошкент шаҳрининг Миробод туманида жойлашган хусусий компания офисидан 560 минг АҚШ доллари, муҳим ҳужжатлар ва флешка сақланган сейф ўғирланди. Бу ҳақда шаҳар Ички ишлар бошқармаси маълум қилди.
Маълумотларга кўра, иккита эркак кечаси Gentra русумли автомобилда келиб, офис эшикларини бузиб кирган. Улар компания раҳбари кабинетидаги сейфни кўтариб чиқиб кетган.
Кузатув камералари ёрдамида гумондорлар шахси аниқланди. Уларнинг бир нафари Андижонда қариндошиникида ушланган. Терговда у сейфни болгарка орқали очиб, пулларни олгани, бўш сейф эса каналга ташлангани маълум бўлди.
Қўлга тушган шахс пулнинг бир қисмини шеригига берган, қолганига Honda мотоцикли сотиб олган ҳамда 10 минг долларни чет элга қочиш ҳаракатлари учун тайёрлаб қўйган. Ҳозирда жиноят иши қўзғатилган, келтирилган моддий зарар тўлиқ қопланган ва тергов ҳаракатлари давом этмоқда.