Air & Space Forces хабар беришича, АҚШ Космик кучлари штаби бошлиғи генерал Брэдли Ченс Залцман миллий хавфсизлик бўйича конференцияда сўзлаб, «Олтин қубба » деб номланган янги ракеталарга қарши мудофаа тизими лойиҳаси ҳақида маълумот берди. Унинг сўзларига кўра, бу лойиҳа учун ҳозирда ажратилган 542 млрд долларлик бюджет етарли эмас.
Ушбу тизим Хитой ва Россия каби рақиб давлатлардан келаётган ҳипертовушли ракеталар ва мураккаб хавф-хатарларни аниқлаш, кузатиш ва йўқ қилиш учун паст ва ўрта орбитага жойлаштириладиган сунъий йўлдошлар тармоғини яратишни назарда тутади.
Залцманнинг таъкидлашича, дастур ҳозирда дастлабки режалаштириш босқичида. У шакллантирилгандан сўнг, ҳужжат АҚШ мудофаа вазири Пит Гегсетга тақдим этилади ва кейинчалик Оқ уйда тасдиқланади.
Мазкур лойиҳа 1980-йиллардаги Роналд Рейганнинг «Стратегик мудофаа ташаббуси» (ёки «Юлдузли урушлар») дастури билан солиштирилмоқда. Ўшанда ҳам АҚШ ядровий ҳужумдан ҳимоя тизимини барпо этмоқчи бўлган, бироқ ташаббус катта харажатлар ва техник чекловлар туфайли тўхтатилган эди.