АҚШ президенти Доналд Трамп Ҳиндистондан олиб кириладиган барча товарларга 25 фоизлик қўшимча бож жорий этувчи фармонни имзолади. Бу ҳақда 6 август куни Оқ уй расмий сайтида хабар берилди. Қарорга кўра, бож Россия Федерациясидан нефт олаётган мамлакатларга нисбатан таҳдид сифатида қабул қилинмоқда.
Оқ уй баёнотида таъкидланишича, Ҳиндистон тўғридан тўғри ёки билвосита Россиядан нефт импорт қилиши АҚШ ташқи сиёсати ва миллий хавфсизлигига зид. Шу боис Трамп импорт товарларига адвалор (тахминан товар божхона қийматига мутаносиб) бож жорий этишни маъқул топди. Бож 21 кундан сўнг кучга киради.
Аввалроқ, 31 июл куни ҳам Трамп Ҳиндистондан импортга 25 фоизлик бож жорий этишни маъқуллаган ва бу қарор 7 августдан кучга кириши белгиланган эди. Бу жараён давомида Ҳиндистоннинг тўртта йирик давлатга қарашли нефтни қайта ишлаш заводи Россиядан нефт харидини вақтинча тўхтатгани ҳақида хабарлар тарқалганди. Аммо кейинчалик мамлакатнинг Россия нефтини харид қилишни давом эттириши аниқ бўлди.
Трамп маъмурияти Ҳиндистондаги бу вазиятни Россияга молиявий ёрдам деб баҳоламоқда. АҚШнинг юқори лавозимли вакили Стивен Миллер таъкидлашича, Ҳиндистон бу ҳаракати орқали Россиянинг Украинадаги урушини молиялаштирмоқда. Унга кўра, Ҳиндистон Россия нефтини харид қилишда Хитойга етиб олган.
Мазкур санкция фонида 6 август куни АҚШ президентининг махсус вакили Стивен Уиткофф Россия президенти Владимир Путин билан Москвада бешинчи марта учрашди. Улар 2025 йилда аввалроқ — 11 феврал, 13 март, 11 апрел ва 25 апрелда ҳам музокаралар ўтказганди.
14 июл куни Трамп НАТО Бош котиби Марк Рютте билан учрашувда, агар 50 кун ичида Украина бўйича тинчлик битимига эришилмаса, Россиянинг савдо ҳамкорларига нисбатан 100 фоизлик божлар қўлланилишини айтган эди. Кейинроқ у ушбу муддатни 10 кунгача қисқартирди.