Франциянинг машҳур France Football журнали 2025 йилги «Олтин тўп» соврини учун курашадиган футболчилар номзодларини эълон қилди. Ушбу мукофотни топшириш маросими жорий йил 22 сентябр куни Париж шаҳрида бўлиб ўтади.
Эътиборли томони, ушбу рўйхатда узоқ йиллардан бери футбол оламида етакчи бўлиб келаётган Криштиану Роналду ва Лионел Месси каби юлдузлар мавжуд эмас.
Йилнинг энг яхши футболчиси унвони учун жаҳоннинг турли мамлакатларидаги етакчи клублардан 30 нафар футболчи номзод сифатида кўрсатилган. Улар орасида Килиан Мбаппе («Реал»), Эрлинг Холланд («Манчестер Сити»), Винисиус Жуниор («Реал»), Харри Кейн («Бавария»), Жуд Беллингем («Реал»), Муҳаммад Салаҳ («Ливерпул»), Роберт Левандовски («Барселона»), Ламин Ямал («Барселона») каби футболчилар бор.
Номзодлар рўйхатида ПСЖдан жами 9 нафар футболчи киритилгани диққатга сазовор — улар орасида Дембеле, Доннарумма, Ҳакими, Нуну Мендеш, Витиня ва бошқалар бор. Шунингдек, «Арсенал», «Ливерпул», «Интер» ва «Барселона» сингари жамоалардан ҳам бир неча футболчилар мукофот учун даъвогар сифатида кўрсатилган.
Эслатиб ўтамиз, ўтган йилги «Олтин тўп» совриндори «Манчестер Сити» ва Испания терма жамоаси ярим ҳимоячиси Родри бўлган эди.