Озарбойжон расмийлари Россия қўшинларининг Украинанинг Одесса областдаги давлат нефт компанияси SOCAR объектларига берган ҳаво зарбаларидан сўнг Украинага қурол етказишга қўйилган эмбаргосини бекор қилиши мумкин. Caliber манбаларига кўра, бундай қарор Москва «Боку манфаатларига қарши тажовузкор сиёсат»ни давом эттирса қабул қилинади.
10 август куни Украина президенти Володимир Зеленский ва Озарбойжон президенти Илҳом Алиев телефон орқали мулоқот қилди. Томонлар Россиянинг республика объекти ва Украинага газ етказувчи компрессор станциясига қаратилган авиаҳужумларни қоралади. Зеленский бу ҳужумларни Украина ва Европанинг энергетик мустақиллигини таъминлайдиган йўлларни тўсиш уриниши сифатида баҳолади. Икки давлат раҳбарлари ҳамкорликни тўхтатмасликка қатъий келишиб олди.
7 августдан 8 августга ўтар кечаси Россия қўшинлари SOCAR нефт базасига «Shahed» туридаги беш дрон-камикадзе учирди. Ушбу ҳужум оқибатида дизел қувурига зарар етди, ёнилғи базасида ёнғин чиқди, компаниянинг тўрт ходими оғир ярадор бўлди. Бу — сўнгги ҳафта ичида Озарбойжонга оид энергетик инфратузилмага қилинган иккинчи ҳужум. 6 август куни ҳам «Орловка» компрессор станциясига ўнлаб дронлар билан зарба берилган эди.
SOCAR ва Украина «Нафтогаз»и ўртасидаги келишув асосида Озарбойжон Украинага газ етказиб бермоқда. Ҳажм катта бўлмаса-да, Киев буни стратегик аҳамиятли деб баҳолайди. Россия Давлат Думаси депутати Константин Затулин бундай ҳамкорликни Москвага нисбатан «нодўстона» қадам дея атаган.
Алиев аввалроқ Озарбойжон Украинага қурол етказмаётганини, аммо 40 млн доллардан ортиқ ҳуманитар ёрдам кўрсатганини айтган. Республика, шунингдек, Ирпен шаҳрини тиклашда ҳам иштирок этмоқда.