Япония 2000 иеналик банкнотни илк бор 2000 йил 19 июлда, Окинавада ўтган «Катта саккизлик» саммити (ҳали Россия иштирокчи эди) муносабати билан муомалага чиқарган. Бу — Иккинчи жаҳон уруши тугаганидан бери мамлакатда қиймати «2» рақамидан бошланувчи илк пул бирлиги эди. Бошқа кўплаб давлатларда бундай амалиёт одатий бўлса-да, Японияда янги купюра оммавий тарзда қабул қилинмади.
Молия вазирлиги ва Япония банкининг тарғибот ишларига қарамасдан, аксарият банкомат ва автоматлар 2000 иеналик купюрани қабул қилмади ёки тарқатмади.
2004 йилнинг августига келиб унинг айланмадаги сони 510 млн донага етган бўлса, кейин кескин камайди. Шу йилиёқ янги банкнотлар босиш тўхтатилди, ҳозир муомалада 100 млн донадан кам, яъни умумий айланишдаги купюраларнинг атиги 0,6 фоизини ташкил этади.
Кўпгина японлар бу пул бирлигини умуман кўрмаган ёки у ҳали ҳам муомалада ишлатилиши мумкинми, деб ҳайрон қолади. Бироқ Окинавада вазият мутлақо бошқача: банкнотдаги Сюри қасрининг рамзи — Шурэймон дарвозаси маҳаллий аҳоли учун юксак аҳамиятга эга. Окинава банки ва Рюкю банкоматларида ҳатто «2000 иеналик устувор» тугмаси мавжуд бўлиб, у орқали мижозлар кундалик харидлар учун махсус шу купюрани ечиб олишлари мумкин.
Банкнотнинг орқа томонида «Гэнжи ҳақида ривоят» асаридан парча ва унинг муаллифи Мурасаки Сикибунинг портрети акс этган. Маданий қиймати сабабли, у Японияга ташриф буюрувчи хорижлик сайёҳлар орасида ҳам қизиқиш уйғотган.
2000 иеналик купюра қиймати агар ўзбек сўмига ўгирилса 170 минг сўм атрофида бўлади.