Ж.Д. Вэнснинг таъкидлашича, Россия ва Украина ўртасида эришилиши мумкин бўлган ҳар қандай келишув икки томон учун ҳам тўлиқ қониқарли бўлмайди. Унинг айтишича, АҚШ мақсади – ҳар икки мамлакат қабул қила оладиган муросага эришиш.
15 август куни АҚШ президенти Доналд Трамп Аляскада Россия президенти Владимир Путин билан Украинадаги урушни тугатиш масаласини муҳокама қилади. Трампнинг таъкидлашича, тарафлар ўт очишни тўхтатишга яқин турибди, аммо бу Украинадан катта ҳудудларни беришни талаб қилиши мумкин.
Украина президенти Володимир Зеленский эса мамлакат Конституциясига зид равишда ҳудудий масалалар бўйича келишувга бора олмаслигини, украинлар ўз ерларини босқинчиларга «совға қилмаслигини» билдирди.
Вэнснинг сўзларига кўра, ҳозирда Путин, Зеленский ва Трамп иштирокида уч томонлама учрашувни ташкил этиш бўйича ишлар олиб борилмоқда, аммо у Путин билан Зеленскийнинг Трампдан олдин учрашиши унумли бўлишига ишонмайди. Оқ уй ҳозирча Путин сўраган икки томонлама саммитни режалаштирмоқда, бироқ Трамп ҳар икки етакчи билан биргаликда учрашиш имкониятини ҳам инкор этмаган.