CNN хабарига кўра, АҚШ президенти Доналд Трамп Анкориждан қайтиш йўлида Украина президенти Володимир Зеленский билан телефон орқали узоқ суҳбатлашган. Суҳбат тафсилотлари ошкор этилмаган, аммо кейинчалик Трамп НАТО давлатлари раҳбарлари билан ҳам боғланган.
Axios нашри маълумотича, Зеленский ва Трампнинг мулоқоти бир соат давом этган бўлиб, унда давлат котиби Марко Рубио ҳамда президентнинг махсус вакили Стив Уиткофф иштирок этган. Кейинчалик бу мулоқотга ярим соат давомида Буюк Британия, Франция, Италия, Германия, Финляндия ва Полша раҳбарлари, шунингдек, НАТО бош котиби Марк Рютте ва Европа комиссияси раиси Урсула фон дер Ляйен ҳам қўшилган.
Зеленский суҳбат якунида берган баёнотида АҚШ президенти билан 18 август куни Вашингтонда Оқ уйда учрашиши белгиланганини маълум қилди. Унинг айтишича, мулоқот «узоқ ва мазмунли» кечган ва унда Трамп Путин билан ўтказган учрашув натижалари ҳақида маълумот берган.
Украина президенти, шунингдек, Киев АҚШ, Украина ва Россия раҳбарлари иштирокида уч томонлама учрашув ташаббусини қўллаб-қувватлашини билдирган.
Эслатиб ўтамиз АҚШ президенти Доналд Трамп Путин билан учрашуви натижалари бўйича Fox News телеканалига берган интервюсида Украинадаги низони ҳал қилиш имконияти Зеленский ва Европа давлатларининг қўлида эканлигини таъкидлаган.