Зеленскийга ушбу учрашувда Европа Иттифоқи ва унга аъзо давлатлар, Буюк Британия ва НАТО алянси етакчилари ҳамроҳлик қилмоқда. Улар яна Оқ уйда даҳанаки жанг бошланиб кетишидан хавотирда. Чунки Зеленский аввалроқ Еврокомиссия раҳбари Урсула фон дер Ляйен билан матбуот анжуманида Трамп билан учрашувдан юқори натижа кутаётганини билдирган бўлса-да, Аляскада Путин қўйган шартларга рози бўлмаслиги ва ҳеч қачон ишғол қилинган Украина ерларидан воз кечмаслигини таъкидлаган.
Зеленский билан яккама-якка учрашувдан сўнг Трамп Украинага ёрдам бериш бўйича Европанинг «Қатъиятлилар коалицияси» аъзолари билан ҳам учрашув ўтказади.
Учрашув олдидан Трамп нима деди?
Трамп Аляскада Путин билан саммитдан кейин берган баёнотида энди Зеленский билан учрашишни ва кейинчалик уч томонлама учрашув ташкил қилишни режалаштираётганини айтган.
«Украина президенти Зеленский агар истаса, Россия билан урушни деярли дарҳол тўхтатиши мумкин ёки у жангни давом эттириши ҳам мумкин. Ҳаммаси қай тарзда бошланганини эслаб қолинг. Обама томонидан (12 йил олдин, бирорта ўқсиз!) топшириб юборилган Қримни қайтариш фикридан воз кечиш ва УКРАИНАНИНГ НАТОГА ҚЎШИЛИШИ ЮЗ БЕРМАЙДИ. Баъзи нарсалар ҳеч қачон ўзгармайди!!!» деб ёзган Трамп ўзига тегишли Truth Social ижтимоий тармоғида.
Учрашув олдидан Зеленский нима деди?
«Биз барчамиз бу урушни тез ва ишончли тарзда тугатишни бирдек хоҳлаймиз. Тинчлик ҳам аввалги йилларда бўлганидек — Украина Қрим ва Шарқимизнинг бир қисмини Донбасснинг бир қисмини бериб юборишга мажбур қилингани, Путин эса бундан янги ҳужум учун плацдарм сифатида фойдалангани сингари эмас, узоқ муддатли бўлиши керак. Ёки 1994 йилда Украинага «хавфсизлик кафолатлари» берилгандек бўлмаслиги керак, бу ишлар натижа бермаганини кўриб турибмиз ».
Учрашувда яна кимлар бўлади?
Вашингтонга қатор Европа етакчилари — Франция президенти Эммануэл Макрон, Германия канцлери Фридрих Мерц, Италия бош вазири Жоржиа Мелони, Буюк Британия бош вазири Кийр Стармер, Финландия президенти Александр Стубб, НАТО бош котиби Марк Рютте ҳамда Европа Комиссияси раиси Урсула фон дер Ляйен келади. Трамп уларни қабул қилиш — «Америка учун катта шараф», деб ёзди.
Учрашув соати
Зеленский Трамп билан Тошкент вақти билан 22:15 да учрашади. Оқ уй расмий тақвимида бу учрашувга бир соат ажратилган, шундан сўнг соат 00:00 да Европа етакчилари билан учрашув бўлиб ўтади.