Ҳужжатга кўра, мамлакатда ишлаб чиқарилмайдиган ва аниқ техник параметрлар асосида олиб кириладиган полиэтилен гранулалари учун 2025 йил 1 сентябрдан 2028 йил 1 январгача акциз солиғи нол ставкада қўлланади.
Шунингдек, айрим этилен ва пропилен полимерларининг бирламчи шаклларини импорт қилишда божхона божи ҳам шу муддатгача нол ставкада белгиланади. Бу тартиб этилен полимерлари учун 3901 10 900 0, 3901 30, 3901 40 кодлари ҳамда пропилен полимерлари учун 3902 10 000 0 кодини ўз ичига олади.
Қарорга мувофиқ, республика ҳудудига сифатсиз ва контрафакт эгилувчан қадоқ маҳсулотларининг кириб келишига қарши қўшимча чоралар кўрилади. Бунда экс-оффицио принципи асосида божхона ва назорат органлари назорати кучайтирилади.
Тадбирлар маҳаллий корхоналарнинг хомашё таъминотини енгиллаштириш, ишлаб чиқариш ҳажмини ошириш ва юқори қўшилган қийматли маҳсулотларни экспорт қилиш имкониятларини кенгайтиришга қаратилган.