18 август куни Украина президенти Владимир Зеленский Вашингтонда АҚШ президентининг Украина бўйича махсус вакили Кит Келлог билан музокаралар ўтказди. Учрашув Hay-Adams меҳмонхонасида, Оқ уй яқинида бўлиб ўтди.
Зеленский музокарадан сўнг Telegram орқали берган баёнотида фронтдаги вазият ва Украина, Европа ҳамда АҚШнинг дипломатик имкониятлари муҳокама қилинганини билдирди. Унинг сўзларига кўра, Россияни тинчликка олиб келишнинг ягона йўли куч орқали амалга ошиши мумкин.
«Президент Трампда бундай куч бор ва биз барча ишларни тўғри амалга оширишимиз керак, шунда ҳақиқий тинчлик бўлади», – деди Зеленский.
Президент айтишича, шу тун ҳам Россия Украина шаҳарларига ҳужумларни давом эттирган. Бу ҳужумларда икки нафар бола ҳалок бўлган, ўнлаб одамлар яраланган. Зеленский Европа хавфсизлиги масаласига ҳам тўхталиб, «агар Европа давлатларидан бири учун тинчлик муҳим бўлса, бу барча қитъа учун тинчликдир», – дея таъкидлади.
Зеленский Украина урушни тугатиш ва барқарор хавфсизликни таъминлаш учун энг самарали йўлларни излашда давом этишини қайд этди. Унинг фикрича, бу асосий вазифа ҳисобланади.
Куннинг иккинчи ярмида Зеленский Оқ уйда АҚШ президенти Доналд Трамп билан тет-а-тет учрашув ўтказиши кутилмоқда. Кейинчалик эса Европа етакчилари иштирокида кенгайтирилган музокаралар режалаштирилган.