Доналд Трамп Оқ уйда Володимир Зеленский ва Европа етакчилари билан бўлиб ўтган учрашувдан сўнг, Россия президенти Владимир Путин билан ҳам мулоқот ўтказганини ва Путин–Зеленский учрашуви бўйича тайёргарлик бошланганини эълон қилди. Унинг айтишича, музокаралар аввал икки томонлама, сўнгра АҚШ иштирокида уч томонлама форматда бўлиб ўтади.
Кремл расмийларининг маълум қилишича, Путин ва Трамп ўртасидаги телефон суҳбати тахминан 40 дақиқа давом этган. Суҳбат чоғида Трамп Путиндан учрашувга розилик олган. Axios ва AFP манбаларининг таъкидлашича, Трамп бу учрашувни август охиригача амалга ошириш ниятида.
Украина президенти Володимир Зеленский ҳам учрашувга тайёр эканини расман билдирди. Унинг сўзларига кўра, энди Киев ўт очишни тўхтатиш шарт эмас, балки узоқ муддатли тинчлик ҳақида келишувларга эришишни устувор вазифа деб билади. У, шунингдек, Трамп билан босиб олинган ҳудудлар масаласини ҳам муҳокама қилганини маълум қилди.
Франция президенти Эммануэл Макрон эса бу музокаралар келгусида Европани ҳам қамраб олувчи тўрт томонлама форматда бўлиши лозимлигини айтди. Унинг фикрича, хавфсизлик кафолатлари фақат Украина учун эмас, балки бутун қитъа учун муҳим.
Германия канцлери Фридрих Мерц эса учрашув икки ҳафта ичида ўтиши кераклигини таъкидлаб, Путинда Зеленский билан учрашишга «етарли жасорат» бор-йўқлигига шубҳа билдирди. Зеленский эса, ўз навбатида, АҚШ билан 90 млрд долларлик қурол шартномаси ҳақида, дронлар хариди ва хавфсизлик кафолатларининг 10 кун ичида ишлаб чиқилиши ҳақида маълум қилди.