Украина президенти Володимир Зеленский Вашингтонда Доналд Трамп ва Европа етакчилари билан ўтказилган музокаралардан сўнг, Украина ҳудудлари масаласини фақат Владимир Путин билан муҳокама қилишини маълум қилди. «Бу масала фақат мен билан Путин ўртасида қолади», — деди у матбуот анжуманида.
Зеленскийнинг таъкидлашича, у АҚШ ва НАТО иттифоқчиларига жанг майдонидаги вазиятни кўрсатиб, Россия томонидан оккупация қилинган ҳудудларнинг тарихини ва бошқарувини муҳокама қилган. У ўз нутқида «ҳар бир фоиз оккупация қилинган ҳудуд учун тортишгани»ни қайд этди.
Музокараларда Россия раҳбари маълум қисмлар алмашувини таклиф этгани ҳақида расмий изоҳ берилмаган. Бироқ матбуотдаги маълумотларга кўра, Путин Донецк областининг айрим қисмларини Россияга ўтказиш, эвазига Суми ва Харкив областларидаги оккупация қилинган ҳудудларни қайтаришни таклиф қилган бўлиши мумкин.
Зеленский Москвадан биринчи навбатда икки томонлама, кейинчалик Трамп иштирокида уч томонлама учрашув ташкил этиш таклифи тушганини маълум қилди. «Биз барча форматларга тайёрмиз. Учрашув ҳеч қандай шартсиз ўтиши керак», — деди у.
Трамп эса Путин билан 40 дақиқалик суҳбат ўтказганини ва саммит учун тайёргарлик бошлаганини эълон қилди. Аммо Кремл расмийси Юрий Ушаков Россия ҳозирча фақат делегация даражасини ошириш имкониятини кўриб чиқишга тайёрлигини билдирди.
Wall Street Journal маълумотларига кўра, Зеленский «мувозанатли ҳудудий алмашинув» имкониятини муҳокама қилишга очиқлигини билдирган. Европа етакчилари эса Донбассни топширишни АҚШдан Флоридани беришни сўрашга тенглаштириб, Трампга бунинг мураккаблиги ва ноқонунийлиги ҳақида тушунтиришга ҳаракат қилган.