Афғонистонда ҳокимият тепасига қайтганига тўрт йил тўлган Толибон илк бор Хитой ва Покистон билан Кобулда уч томонлама учрашув ўтказмоқда. Эртага, 20 август кунига белгиланган бу мажлис гуруҳнинг халқаро легитимликка интилишини кучайтириш йўлидаги муҳим қадам сифатида баҳоланмоқда.
Афғонистон Ташқи ишлар вазирлиги матбуот котиби ўринбосари Ҳофиз Зиё Аҳмад маълум қилишича, музокараларда сиёсий, иқтисодий ва минтақавий ҳамкорликка оид масалалар кўриб чиқилади. Унинг таъкидига кўра, иштирокчилар умумий манфаатлар, ўзаро тушуниш ва кенг қамровли ҳамкорлик асосида муносабатлар юзасидан фикр алмашади.
Учрашувда Хитой ташқи ишлар вазири Ван И, Толибон ташқи ишлар вазири Амирхон Муттақий ва Покистон бош вазир ўринбосари ҳамда ташқи ишлар вазири Ишоқ Дар иштирок этади. Ван Ининг ташрифи унинг Ню-Деҳлидаги музокараларидан сўнг амалга ошмоқда.
Минтақавий нуфузли ўйинчиларнинг Толибон билан очиқ мулоқотга киришиши Кобул раҳбариятининг дунё саҳнасидаги мақомини мустаҳкамлашга хизмат қилмоқда. Шу кунларда Россия Афғонистондаги Толибон маъмуриятини расман тан олган биринчи давлат бўлди.
АҚШ қўшинлари чиқиб кетгандан кейин Пекин Толибон ҳукуматини қўллаб-қувватлашда фаол йўл тутди. Хитой Афғонистоннинг кенг минерал ресурсларидан фойдаланиш, савдо алоқаларини кенгайтириш ва «Бир камар, бир йўл» ташаббусини илгари суриш орқали ўз таъсирини кучайтиришни кўзламоқда. Ван И 2022 йилда ҳам Кобулга ташриф буюриб, иқтисодий тикланиш ва ҳамкорликни муҳокама қилган эди.