«Бугун шуни фахр билан айта оламизки, юртимизда яратилаётган ҳар бир иш ўрни, қад кўтараётган ҳар бир корхона, халқимиз оғирини енгил қилаётган ҳар бир хизмат, экспорт бўлаётган ҳар бир маҳсулот – сизнинг жасорат билан қилаётган меҳнатингиз, ташаббус ва изланишингиз маҳсулидир», — деди давлатимиз раҳбари сўзининг аввалида.
Ҳозир гапираётган рақамларни бир пайтлар тасаввур қила олмасдик — Мирзиёев
Президентимиз ислоҳотларнинг илк кунлариданоқ тадбиркорлар билан ҳамфикрлик асосида Янги Ўзбекистонни қуришга киришилганини эслатди. Сўнгги саккиз йилда иқтисодиётга 230 миллиард доллар сармоя йўналтирилган, шундан 120 миллиард доллардан ортиғи хорижий инвестициядир.
«Бир қарашда айтишга осон ушбу рақамни олдинлари ҳисоб-китоб қилиш тугул, тасаввур қилиб ҳам бўлмасди. Лекин биз буни уддаладик», — деди Президент.
Жаҳон иқтисодиёти қийин вазиятда бўлишига қарамай, мамлакат иқтисодиёти жорий йилнинг биринчи ярим йиллигида 7,2 фоизга ўсгани қайд этилди.
Тадбиркорларни қўллаб-қувватлаш сиёсатини иқтисодиётда янада юқори натижалар келтиради — Мирзиёев
Давлат раҳбари сўзларига кўра, яратилган шарт-шароитлар туфайли минглаб микро ва кичик бизнес субъектлари қисқа вақт ичида ўрта ва йирик корхоналарга айланди. Масалан, 1 600 та микро корхона бир йил ичида айланмасини 10 миллиард сўмдан ошириб ўрта бизнесга ўтган, 143 та корхона эса 100 миллиард сўмдан кўпроқ айланма билан йирик бизнес қаторига қўшилган.
Статистик маълумотларга кўра, ўтган йили айланмаси 1 трлн сўмдан ошган 203 та корхона бўлган бўлса, бу йилнинг олти ойида яна 47 та йирик корхона вужудга келди. Бизнесни соя иқтисодиётидан чиқариш орқали 139 минг корхонада иш ўринлари 811 мингтага кўпайган, 273 минг корхонада иш ҳақи фонди 22 фоизга ошган.
Хусусий секторда ўртача ойлик иш ҳақи ўтган йили 4 млн сўм бўлган бўлса, бугунга келиб 5 млн сўмга яқинлашди. Президентнинг таъкидлашича, тадбиркорларни қўллаб-қувватлаш сиёсатини изчил давом эттириш иқтисодиётда янада юқори натижаларга хизмат қилади.