Ўзбекистонда қарздорларга қаратилган ижро жараёнларига муҳим янгилик киритилди. Президент Шавкат Мирзиёев 19 август куни имзолаган қонунга биноан, қарздорлар мол-мулкига қўйилган ҳибсни гаров депозити орқали бекор қилиш имкониятига эга бўлади.
Янги тартибга мувофиқ, агар суд қарори ёки ижрочи қарори устидан шикоят берилса, қарздор қарз миқдори ёки унинг тўланмаган қисмига тенг суммада кафолат депозитини киритиши мумкин. Бу маблағлар Мажбурий ижро бюросининг махсус ҳисоб рақамига ўтказилади. Шундан кейин қарздорнинг мол-мулкидан ҳибс бекор қилинади ва ижро иши вақтинча тўхтатилади.
Қонунга кўра, агар суд қарздорнинг манфаатига қарор чиқарса ёки ижро иши якунланса, киритилган гаров маблағи уч иш куни ичида қайтарилади. Бироқ қарор ўз кучида қолса, депозит қарзни узиш учун йўналтирилади.