Иқтисодий тадқиқотлар ва ислоҳотлар маркази (ИТИМ) Шавкат Мирзиёевнинг 20 август — Тадбиркорлар куни муносабати билан куни Янги Тошкентда бўлиб ўтган тадбиркорлар билан очиқ мулоқоти чоғидаги нутқининг лингвистик таҳлилини эълон қилди.
Лингвистик таҳлил натижаларида энг кўп қўлланилган атама «тадбиркор» бўлиб, у 107 марта тилга олинган. Шунингдек, «бизнес» – 34 марта, «корхона» – 29 марта, «солиқ» – 21 марта ишлатилган. «Инвестиция», «лойиҳа» ва «кредит» сўзлари 15 мартадан, «тизим» – 14 марта, «шароит», «банк» ва «стартап» – 13 мартадан, «экспорт» эса 12 марта тилга киритилган.
Нутқда айрим иборалар ҳам кўп такрорланган. Жумладан, «бизнес вакиллари» – 8 марта, «очиқ мулоқот» – 7 марта, «имтиёзли кредит» – 4 марта тилга олинган. «Янги Ўзбекистон», «кичик бизнес», «ёш тадбиркор» каби иборалар эса 3 мартадан қўлланган.
ИТИМ таъкидлашича, Президент нутқида тадбиркорликни қўллаб-қувватлаш, инвестиция ва кредит имкониятларини кенгайтириш, солиқ юкини енгиллаштириш, экспорт салоҳиятини ошириш ва бизнес муҳитини яхшилаш масалаларига катта эътибор қаратилган.
Сўнгги йиллар таҳлиллари ҳам «тадбиркор» атамаси Президент мулоқотларида доимо марказий ўринни эгаллаб келаётганини кўрсатади. Шу билан бирга, «кредит» ва «инвестиция» каби сўзларнинг мунтазам қўлланилиши молиялаштириш ва сармоя жалб қилишга устувор аҳамият қаратилганидан далолат бермоқда.