TBC Bank Group учинчи йирик харидини амалга оширди — OLX Uzbekistan сотилди
Грузияда етакчи молия хизмати гуруҳи ва Ўзбекистонда энг йирик рақамли банк экотизимларидан бири ҳисобланувчи TBC Bank Group OLX Uzbekistan назорат пакетини сотиб олди. Битим Titan Investments халқаро инвестиция ҳолдинги билан қўшма корхона орқали амалга оширилган.
Натижада OLX Uzbekistan акцияларининг 100 фоизи ҚКга ўтади. TBC назорат пакетини (50% + 1 акция), Titan Investments эса қолган улушни олади. Сотувчи Prosus таркибига кирувчи OLX Group бўлди. Банк аввалроқ BILLZ retail management SaaS платформаси ҳамда мамлакатда кенг оммалашган Payme тўлов иловасини таркибига қўшиб олган эди.
Уй таъмири, таълим ёки тўй: Ўзбекистонликлар пулларини асосан нималарга сарфлаяпти?
Ўзбекистон аҳолисининг барча қатламларида уй-жой таъмири учун харажатлар юқори улушга эга бўлмоқда. Шунингдек, асосий харажатлар қаторида таълим ва даволаниш учун қилинадиган сарфлар юқори. Бу ҳақда Марказий банк эълон қилган «Истеъмол кайфияти шарҳи»да келтирилган.
Келгуси чоракда режалаштираётган йирик харидлар бўйича сўров натижаларига кўра, респондентлар асосан уй-жой таъмирлаш, таълим ва соғлиқни сақлаш каби йўналишларда йирик харажатларни режалаштирмоқдалар. Шу билан бирга, автомобил хариди, тўй маросимлари ва саёҳат қилиш каби харажатлар бўйича кутилмаларнинг улуши ҳам юқори шаклланмоқда ва бу ушбу товар ва хизматларга бўлган талаб келгуси даврда ҳам юқори қолишини кўрсатади.
Ўзбекларни ҳақоратлаган тиктокер 3 йил 1 ойга қамалди
«Абдуллоҳ» тахаллуси билан танилган тиктокер Югай Валерий Ўзбекистон Республикаси Президентига тажовуз қилиш ҳамда миллий, ирқий, этник ёки диний адоват қўзғатиш жиноятларини содир этганликда айбланиб, 3 йил 1 ой муддатга озодликдан маҳрум қилинди. Жазо манзил-колонияларда ўталиши белгиланди.
«Абдуллоҳ» номи билан танилган тиктокер Югай Валерий миллатлараро низо чиқариши мумкин бўлган ва ўзбекларга нисбатан ҳақоратомуз сўзларни айтиб, чиқишлар қилган. Хусусан, бир видеосида Ўзбекистон давлатини тан олмаслигини, у ерда туғилганидан норозилигини ва ҳеч қачон бормаслигини, TikTok`да ўтирган барча ўзбек қизлари фоҳишалигини, яна бирида эса 3 миллион обуначи ва 100 миллион like йиғилса, онасини ўлдиришини айтиб чиққан.
«Отамдан қолган далалар» нега тақиқлангани айтилди
Ўзбекистон Фанлар академияси Тарих институти директори, тарихчи Азамат Зиё «Davra» подкастида машҳур «Отамдан қолган далалар» фильмининг нега эфирдан олиб ташланганига ойдинлик киритди. Унинг сўзларига кўра, мустақилликдан кейин ҳам ўзбек жамиятида совет давридан мерос бўлиб қолган бошқарув усули узоқ йиллар сақланиб келган.
Азамат Зиё таъкидлашича, ўзбек халқи мустақилликдан кейин ҳам узоқ йиллар совет давридаги каби бошқарув тизимида яшаган. «Шавкат Мирзиёев халқимизни паxтa қулчилигидан қутқарганини тўла англаб етмадик. Юз йил давомидаги мажбурий меҳнат саводсиз авлодни вужудга келтирди», деди у.
1998 йилда давлат маслаҳатчиси билан филм премьерасида қатнашганини эслаган Зиёнинг айтишича, «Отамдан қолган далалар» дастлаб эфирга узатилган, катта қизиқиш уйғотган, аммо кўп ўтмай «қора рўйхат»га тушган. Унинг фикрича, филмда тасвирланган колхоз тизими, мажбурий меҳнат ва колония белгиларининг мустақилликдан кейин ҳам сақланиб қолгани намойиш этилиши асосий сабаб бўлган.
Президент нутқида энг кўп ишлатилган сўзлар эълон қилинди
Иқтисодий тадқиқотлар ва ислоҳотлар маркази (ИТИМ) Шавкат Мирзиёевнинг 20 август — Тадбиркорлар куни муносабати билан куни Янги Тошкентда бўлиб ўтган тадбиркорлар билан очиқ мулоқоти чоғидаги нутқининг лингвистик таҳлилини эълон қилди.
Лингвистик таҳлил натижаларида энг кўп қўлланилган атама «тадбиркор» бўлиб, у 107 марта тилга олинган. Шунингдек, «бизнес» – 34 марта, «корхона» – 29 марта, «солиқ» – 21 марта ишлатилган. «Инвестиция», «лойиҳа» ва «кредит» сўзлари 15 мартадан, «тизим» – 14 марта, «шароит», «банк» ва «стартап» – 13 мартадан, «экспорт» эса 12 марта тилга киритилган. Нутқда айрим иборалар ҳам кўп такрорланган. Жумладан, «бизнес вакиллари» – 8 марта, «очиқ мулоқот» – 7 марта, «имтиёзли кредит» – 4 марта тилга олинган. «Янги Ўзбекистон», «кичик бизнес», «ёш тадбиркор» каби иборалар эса 3 мартадан қўлланган.
Ўзбекистон нега қашшоқ мамлакатлар қаторига кирди? — иқтисодчи тушунтиради
Ўзбекистонда иқтисодий кўрсаткичлар ҳақида гап кетганда кўпинча «иқтисодёт ўсмоқда, лекин харид қобилияти ошмаяпти», деган фикрлар янграйди. Иқтисодчи Юлий Юсупов «Seredin» YouTube каналига берган интервюсида бу тушунча аслида нимани англатишини, нега мамлакатда йиллар давомида сунъий «чиройли рақамлар» яратилганини ва Ўзбекистон нега қўшни Қозоғистондан орқада қолиб кетганини батафсил шарҳлаган.
Юсуповнинг таъкидлашича, «харид қобилияти» бевосита реал даромадлар ва реал истеъмол харажатлари билан белгиланади. «Номинал даромадларнинг ўсиши инфляцияни ҳисобга олмагунча ҳеч нарсани англатмайди. Аҳолининг ҳақиқий турмуш даражасини фақат инфляциядан тозаланган кўрсаткичлар орқали ўлчаш мумкин», — дейди у.