Президентнинг сўзларига кўра, Қуролли Кучлар ҳар куни давлат манфаатларини ҳимоя қилиш билан шуғулланмоқда ва эҳтимолий таҳдид манбаларини доимий кузатиб бормоқда. У мамлакатга замонавий дронлар ҳамда янги артиллерия тизимлари етказилганини, жанговар самолётлар харид қилиниб, мавжудлари модернизациядан ўтказилганини маълум қилди. Бу ҳақда Озарбойжон Президенти Илҳом Алиев 21 август куни Келбажар туманига ташрифи чоғида маҳаллий аҳоли билан учрашувда айтиб ўтди.
Алиев дунёдаги сиёсий жараёнлар шиддат билан кечаётганини таъкидлаб, хавфсизликнинг ягона кафолати армия ва халқ бирлиги эканини қайд этди. Унинг фикрича, Озарбойжонга қарши ҳар қандай провокацияга уринадиган кучлар яна пушаймон бўлади. Президент мамлакат энди ғолиб давлат сифатида ўз йўлини давом эттиришини билдирди.
Шунингдек, Алиев Арманистон билан тинчлик шартномаси ҳақида тўхталиб, ҳужжатнинг асосий муаллифи Боку эканини таъкидлади. Унга кўра, шартнома икки давлат ўртасидаги узоқ йиллик қарама-қаршиликка чек қўйган.
Президентнинг айтишича, мазкур келишув натижасида Озарбойжон тарихий ҳудуди бўлган Нахчивон билан қуруқлик алоқасини тиклайди. У бу масала 2020 йилдан буён кун тартибидан тушмаганини ва энди амалга ошганини қайд этди. Алиев яқин йилларда асосий Озарбойжондан Нахчивонга темирйўл ва автомашина орқали бориш мумкин бўлишига ишонч билдирди.
Эслатиб ўтамиз, Мирзиёев Алиевни Озарбойжон ва Арманистон ўртасида имзоланган тинчлик декларацияси имзолангани билан табриклаган эди.