Украина президенти Володимир Зеленскийнинг сўзларига кўра, Туркия расмийлари Қора денгизда хавфсизлик кафолатларининг бир қисми бўлишга тайёр эканини айтган. Унга кўра, мамлакатлар турлича имкониятларга эга: айримлар ҳарбий иштирок, бошқалар разведка, молиявий ёрдам ёки дипломатик воситачиликни таклиф этмоқда.
Зеленский 22 август куни Киевда НАТОнинг янги бош котиби Марк Рютте билан биргаликда ўтказилган матбуот анжуманида шу ҳақда маълум қилди. «Ким ҳарбийларини жўнатиш билан, ким ҳаводан, ким денгиздан, ким молиялаш орқали ёрдам бера олишини гапиришга эрта, кимдир Конституцияси туфайли бевосита иштирок этолмайди, аммо молиявий ёрдам беришга тайёр», — деди у.
У Туркиянинг позициясини аниқлаштириб, уларнинг «Биз Украина учун хавфсизлик кафолатининг бир қисми бўлишга тайёрмиз. Бу борада биз профессионалмиз, Қора денгизда қандай ёрдам беришни биламиз ва айнан шунга эътибор қаратамиз. Бу ерда бизнинг иштирокимиз тўлиқ бўлади», деган изоҳини келтирди.
Бундан аввалроқ Туркия президенти Ражаб Тоййиб Эрдўған Анқара Украинадаги урушга адолатли якун ясалиши учун фаол ҳаракат қилмоқда, деб баёнот берган эди. У АҚШдаги музокараларни диққат билан кузатиб бораётганини ва Туркия Киев ҳамда Москва ўртасидаги ҳар қандай мулоқот ташаббусини қабул қилишга тайёрлигини билдирган.