24 август куни эълон қилинган сунъий йўлдош суратларида «Унеча» станциясидаги асосий насос блоки, бир нечта техник иншоотлар ва муҳандислик ускуналари бутунлай ёниб кетгани акс этган.
Мазкур станция Россия нефтини Уст-Луга порти орқали экспорт қилиш, шунингдек, Словакия ва Венгрияга етказиб беришда ҳал қилувчи нуқта ҳисобланади.
Ҳужумни Украина Қўшинларининг дрон тизимлари бўлими командири Роберт Бровди (лақаби «Мадьяр») 21 август куни тасдиқлаган. Унинг таъкидлашича, бу ҳаракат «Дўстлик» қувури инфратузилмасига яна бир зарба бўлди.
«Дўстлик» нефт ҳайдаш қувури Россиядан Европага нефт етказиб беришнинг стратегик линияларидан бири саналади. У орқали Словакия, Венгрия ва Чехия нефт билан таъминланади. «Унеча» эса мазкур қувурнинг энг муҳим логистик нуқталаридан бири бўлиб, ундаги узилиш бутун йўналишдаги транспорт оқимини муваққатан тўхтатади.
Ҳозирча Россия расмийлари томонидан ҳодисага расмий муносабат билдирилгани йўқ. Аммо бундай ҳужумлар Россия экспорт инфратузилмаси учун жиддий хавфли ҳисобланади.
Украина президенти Володимир Зеленский мамлакат мустақиллмги кунига бағишланган матбуот анжуманида журналистларнинг «Дўстлик» нефт ҳайдаш қувурига Украин дронлари томонидан қилинган ҳужум ҳақидаги саволга ҳазил билан жавоб берди.
«Биз ҳар доим Украина ва Венгрия ўртасидаги дўстликни қўллаб-қувватлаб келганмиз, энди эса бу «Дўстлик»нинг ўзи Венгрияга боғлиқ», — деган Зеленский. У бу сўзларни Венгрия бош вазири Виктор Орбаннинг Украина Евроиттифоққа қўшилиши юзасидан вето қўйгани ҳақида гапира туриб айтган.