АҚШ президенти Доналд Трамп июн ойида имзолаган фармойишга кўра, мамлакат компанияларига Сурия билан бизнес қилишга йўл очилди. Молия вазирлиги қошидаги OFAC бошқармасига кўра, қарор 26 августдан кучга кирди. Бу қадам 2024 йил декабрда Башар Асад режими ағдарилиб, ҳокимиятга «Ҳайъат Тахрир аш-Шом» етакчиси Аҳмад аш-Шараъа келганидан кейин қабул қилинди.
Вашингтоннинг изоҳлашича, санкцияларни бекор қилиш АҚШнинг Сурияга нисбатан сиёсатдаги ўзгаришлар ва миллий фавқулодда ҳолатнинг тугатилиши билан боғлиқ. Бироқ «Сезар қонуни» тўлиқ бекор қилиниши учун Конгресс қарори талаб этилади. Ҳозирча ушбу санкциялар 180 кунга тўхтатиб қўйилган.
Санкциялар илк бор 2004 йил майда 13338-сонли президент фармони асосида киритилган бўлиб, Суриянинг терроризмни қўллаб-қувватлаши, Ливанга босқини, қўлёзма дастурлари ва Ироқдаги беқарорликдаги роли асос қилиб кўрсатилган эди. Кейинчалик улар қатор президент фармонлари орқали янада кенгайтирилган.
14312-сонли янги фармон эса ушбу чекловларни бекор қилади. Бироқ террорчиликка алоқадор шахслар, инсон ҳуқуқларини бузганлар ва кимёвий қурол билан боғлиқ фаолият юритганларга қарши чоралар амал қилишда давом этади.