«Австралия ҳудудида хорижий давлат томонидан уюштирилган, жамият бирдамлигини заифлаштириш ва ижтимоий низоларни кучайтиришга қаратилган хавфли тажовуз», дея баҳолади мамлакат бош вазири Энтони Албанезе.
Расмий маълумотларга кўра, Австралия ўзининг Теҳрондаги элчихонаси фаолиятини тўхтатган ва дипломатларни хавфсиз учинчи давлатга кўчирган. Шу билан бирга, Албанезе ҳукумати Эроннинг Ислом инқилоби муҳофизлари корпусини террорчи ташкилот сифатида тан олиш имкониятини кўриб чиқмоқда.
2023 йил октябр ойида Исроил ва Ғазо ўртасида уруш бошланганидан бери Австралияда яҳудийларга қарши ҳужумлар кескин кўпайган. Хусусан, уйлар, мактаблар ва синагогаларда зўравонлик ҳолатлари қайд этилган. Июл ойида Мелбурндаги бир синагога ёқиб юборилган, полиция эса гумонланувчига нисбатан жиноят ишини қўзғатган.
Австралия ва Эрон муносабатлари сўнгги йилларда таранглашиб бораётган эди. Ғазо ва Исроил ўртасидаги можаролар бутун дунёда бўлгани каби Австралияда ҳам ижтимоий зиддият ва норозиликларни кучайтирмоқда. Яҳудий жамоаси эса ҳукуматдан хавфсизлик чораларини янада кучайтиришни талаб қилмоқда.