Қозоғистоннинг Олмаота шаҳрида суд биринчи атом электр станцияси (АЭС) қурилишига қарши чиққан беш нафар фаолни оммавий тартибсизликларга ундаганликда айбдор деб топди ва уларга тўрт йилдан озодликни чеклаш жазосини тайинлади. Бу ҳақда ТАСС хабар берди.
Қайд этилишича, ҳукм шаҳарнинг Олмаота туман суди томонидан чиқарилган.
«Нурлан Жаулибаев, Жанат Қозоқбой, Фазилжон Сиздиқов, Нурлан Темиргалиев ва Айдар Мубораковни Қозоғистон Республикаси Жиноят кодексининг 272-моддаси 3-қисми бўйича (ҳокимият органларининг қонуний талабларига бўйсунмасликка ва оммавий тартибсизликларга ундаш — таҳр.) айбдор деб топиш ва уларнинг ҳар бирига тўрт йил озодликни чеклаш жазоси тайинлансин», — деган судья Ернар Қосимбеков.
Шунингдек, суд уларга беш йил мобайнида жамоат фаолияти билан шуғулланиш ва сиёсий партиялар тузишни ман этган.
Қайд этилишича, АЭС қурилишига қарши чиқаётган фаоллар ўтган йилнинг сентябр ойи охирида ҳибсга олинган. Судда давлат айбловчиси уларнинг ҳар бирини беш йилдан озодликдан маҳрум қилишни талаб қилган, иш бўйича айбланувчилар эса оқлов ҳукмини талаб қилишда давом этишган. Мазкур модда бўйича белгиланган жазо — уч йилдан беш йилгача озодликни чеклаш ёки шу муддатга озодликдан маҳрум қилишдан иборат.