Германия канцлери Фридрих Мерц Украина президенти Володимир Зеленский ва Россия раҳбари Владимир Путин ўртасидаги учрашув яқин фурсатда ўтказилмаслигини маълум қилди. У бу ҳақда Франция президенти Эммануэл Макрон билан ўтказган қўшма матбуот анжуманида гапирди. Мерцнинг таъкидлашича, Доналд Трамп ва Путин ўртасида илгари келишув бўлганига қарамай, бу музокара амалга ошмайди.
Бу баёнот 28 августга ўтар кечаси россияликларнинг Киевга навбатдаги зарбаси ортидан янгради. Украина расмийларига кўра, Москва томонидан дронлар, қанотли ва баллистик ракеталар ишлатилган. Киев ҳарбий маъмуриятининг хабар беришича, ҳужум натижасида 21 киши ҳалок бўлган, улар орасида камида 4 нафар бола бор. Барча туманларда зарар етказилган, Дарницадаги беш қаватли уйнинг бир подъезди бутунлай вайрон қилинган.
Зеленский ва Путин учрашуви мавзуси август ойи ўрталарида долзарблашган эди. 15 август куни Доналд Трамп Анкорижда Путин билан учрашиб, Украина ҳам иштирок этадиган уч томонлама музокара ташаббусини илгари сурганди. Бироқ орадан ҳафта ўтмайоқ Трамп Путин Зеленский билан тўғридан тўғри мулоқот қилишни истамаслигини тан олди — гўёки у украин раҳбарини ёқтирмас экан.
Россия музокаралар учун қўшимча шартларни қўймоқда. Ташқи ишлар вазири Сергей Лавровнинг айтишича, учрашув фақат «кун тартиби тўлиқ келишилгандан» сўнг амалга ошиши мумкин. Украина эса музокаралар бўйича масъулиятни Кремл зиммасига юкламоқда. Президент Зеленский: «Биз музокарадан қочмаяпмиз, исталган форматда тайёрмиз. Москва томонидан ҳеч бўлмаганда минимал конструктив ёндашув бўлишига умид қиламиз», — дея таъкидлади.
26 август куни Мерц агар Зеленский ва Путин ўртасидаги музокаралар амалга ошмаса, Ғарб Россияга нисбатан янги босим чораларини кўриб чиқишини айтди. Шунингдек, у Зеленскийнинг АҚШга яқиндаги сафарида ҳам музокараларга тайёрлигини тасдиқлаганини эслатди.