Тошкентда Янги Ўзбекистон кўчаси бўйлаб замонавий ерости автомобиль йўли фойдаланишга топширилди. Президент Шавкат Мирзиёев мазкур иншоотни кўздан кечирди. Йўл аҳоли сони ортиб, шаҳар ҳудуди кенгаяётгани сабабли транспорт оқимини енгиллаштириш мақсадида қурилди. Бу ҳақда президент матбуот хизмати хабар берди.
Узунлиги 468 метр ва кенглиги 25 метр бўлган туннель янги уй-жойлар, истироҳат боғи, университет ва Олимпия шаҳарчаси қурилган ҳудуддан ўтади. У келгусида Янги Тошкентга олиб борувчи йўлнинг муҳим қисмига айланиши кутилмоқда.
Туннел устки қисмида яшил ҳудуд барпо этилди ва пиёдалар учун хавфсиз йўлаклар яратилди. Шунингдек, бу йўналишда келгусида қуриладиган метро бекати учун ҳам туннел тайёрланди.
Муҳандислар ҳисоб-китобларига кўра, янги йўл автомобилистлар вақт сарфини икки баробарга қисқартиради. Кунлик ёнилғи тежами 1 тоннани ташкил этса, атмосферага чиқадиган зарарли газлар ҳажми 2 тоннага камаяди.
Президент Мирзиёев лойиҳанинг экологик жиҳатларига алоҳида эътибор қаратди. Давлат раҳбарининг таъкидлашича, замонавий инфратузилма на фақат аҳолига қулайлик яратади, балки туризм ривожига ҳам хизмат қилади.
