Bloomberg Billionaires Index маълумотларига кўра, «Labubu» қўғирчоқлари ва Хитойнинг Pop Mart компанияси асосчиси Ван Нинг дунёнинг энг бой инсонлари рўйхатида 85-ўринни эгаллади. Унинг бойлиги бир йил ичида қарийб $20 млрдга кўпайди.
Ван Нингнинг асосий даромад манбаи Pop Mart акциялари бўлиб, у «blind box» сегментида Хитойдаги энг йирик ишлаб чиқарувчига айланган. Бу сегментда харидор қайси версия қўлга тушишини олдиндан билмайди. Шу орқали компания қиймати жадал ўсиб, асосчисини миллиардерлар қаторига қўшди.
Ўзбекистонда ҳам «Labubu»га қизиқиш кескин ортган. Uzum Market маълумотларига кўра, май ойидан буён талаб юқори бўлиб, айрим ҳолларда фуқаролар жами $110 минг сарфлаган. Энг оммалашган модел 900 дан зиёд буюртмага эга бўлган. Тошкент, Самарқанд, Фарғона, Бухоро ва Навоийда сотувлар айниқса фаол кечган.
Шу билан бирга, АҚШ бозорида қалбаки «Labubu»лар пайдо бўлгани ҳақида истеъмолчилар огоҳлантирилди. Мутасаддиларнинг таъкидлашича, сохта қўғирчоқлар болалар учун хавфли бўлиб, бўғилиш ҳолатларига сабаб бўлиши мумкин. Интернетда «Lafufu» номи билан тарқалган сохта маҳсулотлар талаб юқорилашгани билан бирга кўпая бошлаган.
«Labubu» қўғирчоқлари 2019 йилдан бозорда, аммо 2025 йилга келиб Осиёдан ташқари Европада ҳам хитга айланди. Очиқ табассумли қиёфаси билан машҳур бу ўйинчоқлар катталар, мода ишқибозлари ва коллекционерлар орасида ҳам оммалашиб, дўконларда навбатлар пайдо бўлишига сабаб бўлди.
Forbes маълумотларига кўра, Ван Нинг илк бор Хитойнинг энг бой 10 кишиси қаторига кирди. У бу рўйхатда ByteDance асосчиси Чжан Имин ва Tencent ҳаммуассиси Ма Хуатен билан бирга энг ёш миллиардерлардан бири сифатида қайд этилмоқда.