«Эл-юрт умиди» жамғармаси 2025- йилги 1-очиқ стипендия танлови натижаларини эълон қилди. Унга кўра, 173 киши стипендиат сифатида саралаб олинган. Vaqt.uz ғолиб бўлган талабалар ва уларнинг танлов жараёнларидаги балларини текшириб кўрди.
Очиқ маълумотларни ўрганиш давомида шубҳали ҳолат гувоҳи бўлдик. Яъни ғолиб бўлганлар орасида Ғайбуллаев Шомурод Олимович суҳбат босқичидан 0 балл олган, тест натижалари эълон қилинган рўйхатда эса унинг исм-фамилияси йўқ.
Шунга қарамасдан, шу йилги ғолиблар орасида 35-ўринда турибди.
Яна бир номзод — Тожибоев Рашид Собир ўғли суҳбат босқичидан 47 балл билан ўтган. Бироқ у ҳам 121-ўринда ғолиблар рўйхатида турибди. Низомга кўра, номзод 100 баллдан камида 61 балл олсагина «суҳбатдан ўтган» ҳисобланади. (Р.Тожибоев таҳририят билан боғланиб, бали юзасидан апелляцияга бергани ва апелляция унинг аризасини қаноатланитириб, 61 бал қўйганини маълум қилди)
Бундан ташқари, Ахмадов Шамшодбек Ваҳобжон ўғли билан ҳам шундай ҳолат кузатилган. У суҳбат жараёнида 52,8 балл олган.
Кидирбаева Айнура Рашид қизининг суҳбат натижалари эса 57,7 балл бўлган. Яъни низомга мувофиқ тарзда у «суҳбатдан ўтмаган» деб топилиши керак эди, чунки номзод энг камида 61 балл олиши лозим. Аммо Айнура Кидирбаева 57-ўринда стипендия танлови ғолиб бўлган.
Бу ерда балки қандайдир техник хатолик ёки истиснолар бўлиши мумкин. Ёки талабалар суҳбат балларини апелляцияга берган, уларнинг аризалари қаноатлантирилган бўлиши мумкин. Бунга ойдинлик киритиш мақсадида жамғарманинг матбуот котиби билан телефон орқали боғланишга бир неча марта уриниб кўрдик, лекин қўнғироқларимизга жавоб бермади.
Аввалроқ, Vaqt.uz’нинг YouTube каналининг 2024 йил октябр ойида «Эл-юрт умиди» жамғармаси стипендияси ғолиби сифатида эълон қилинган, бироқ қарийб 1 йилдан буён чет элга ўқишга кета олмаётган Азим Ахтамов ҳақида суриштирув эълон қилган эдик.
Суриштирувдан 1 ҳафта ўтгандан кейин ҳам расмийлардан ҳеч қандай жавоб олмаганимиз, ҳолат жамоатчилик фаоллари ва томошабинлар орасида муҳокамаларга сабаб бўлгани, расмийлардан умуман жавоб олмаганимиз ҳақида материал тайёрлаган эдик. Афсуски, бу иккинчи материал эфирга чиққанидан кейин ҳам ҳеч қандай муносабат берилмади.
Азим Ахтамовнинг маълум қилишича, жамғармадан унинг электрон почтасига хат келган. Айтилган топшириқни бажариб, фонд биносига борганида эса ҳеч ким тайинли жавоб айтмаган. У сабр тугагани ва жамғармадан умидини узганини таъкидлади.
«Шукрки, ўқишимни баҳорги семестрга кўчира олдим. Тагин вазиятимни айтганимда университет томонидан озми-кўпми грант билан қўллаб-қувватландим. Бу дегани, ўзингники бўла туриб бермаган ёрдамни ажнабий халқ берди», деб Facebook’да Азим Ахтамов ёзган.
«Эл-юрт умиди» жамғармасидан юқоридаги барча ҳолатлар бўйича расмий муносабат кутамиз.
Маҳлиё Ҳамидова тайёрлади.