Шавкат Мирзиёев 29 август куни Ислом цивилизацияси марказига ташриф буюриб, сўнгги бунёдкорлик ишлари билан танишди. Бу ҳақда президент матбуот котиби хабар берди.
Марказ қадимги меъморий обидалар шаклида бунёд этилмоқда. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Марказда Қуръони карим зали, халқаро анжуманлар зали ва тарихий шaхслар фаолиятига бағишланган кўргазмалар учун махсус бўлимлар ташкил қилинган.
Марказнинг қадимий меъморий шаклдаги биноси миллий гумбаз ва пештоқлар билан безатилган бўлиб, унда мусулмон дунёсининг маънавий мероси – Усмон Мусҳафи ва бошқа нодир Қуръонлар сақланади. Шунингдек, марказда халқаро учрашувлар ва туризмни ривожлантиришга кўмаклашиш мақсадида савдо ва хизмат кўрсатиш иншоотлари ҳам барпо этилган.
Ўзбекистон улуғ тарихга эга. Буюк аждодларимиз томонидан яратилган илмий ва маданий мерос инсоният тарихида ўчмас из қолдирган. Улар билан дунё ҳамжамиятини хабардор қилишда ушбу марказнинг ўрни беқиёс бўлишига ишонаман, – деди Шавкат Мирзиёев.
Президент Шавкат Мирзиёев бунёдкорлик ишларини юқори баҳолаб, марказнинг фаолиятини тўғри ташкил этишга оид кўрсатмалар берди.
