Сирдарё вилояти ҳокими Эркинжон Турдимов мажбурий меҳнатга буюрган мактаб директорлари ва мажбурий меҳнатга чиққан ўқитувчилар ишдан олиниши кераклигини айтди. Бу ҳақда 27 август куни IV Устозлар миллий форумида сўз очди.
«Ўқитувчиларга мажбурий меҳнат мутлақо мумкин эмас. Фурсатдан фойдаланиб бир нарсани айтмоқчиманки, бирорта мактабда мажбурий меҳнат бўлса, автоматик тарзда директори ишдан олиниши керак. Шунингдек, мажбурий меҳнатга чиққан одамни ҳам ишдан олиш керак. Чунки уни мажбурлаб ишга чиқарган бўлса… «чиқ» деса, чиқиб кетаверса, у қанақа ўқитувчи бўлади?!», — деди Турдимов.
Шунингдек, ҳоким мажбурий обуна масаласига ҳам тўхталиб, бунга йўл қўйган мактаб директори ишдан кетишини айтди.
«Мана мени қийнайдиган иккинчи масала – обуна масаласи. Бирорта ўқитувчи газетага мажбуран обуна бўладиган бўлса, ўша мактаб директорини ишдан оламан. Ҳамма билиб олсин. Ўша пайтда ишдан оламан. Обуна бўлсангиз, ўзингиз бўлинг… битта газетага, ана тўрт-беш ўринбосарингиз, завхозингиз обуна бўлсин. Ўқитувчига тегманг. Бундан ташқари, обуна учун мактабларга молия томонидан пул ажратилган, 4 миллиард сўмдан ортиқ», — деди ҳоким.
Журналист Шуҳрат Шокиржонов ўзининг ижтимоий тармоқдаги саҳифасида ҳокимнинг ўшбу нутқига қуйидагича муносабат билдирди.
«Бир қараганда, чиройли ва ўринли гаплар. Лекин бундай мажбурий меҳнатни юзага чиқариш учун «жиноят»нинг устига кимдир бориб қолиш керак. Чунки «сендан угина, мендан бугина» қабилидаги бундай win-win концепция шундоқ ҳам республикамизнинг аксарият мактабларида неча йиллардан бири швейцария соатидек аниқ ишлаб келмоқда. Бундан кейин ҳам ишлашда давом этади, мабодо шахсан Турдимовнинг ўзи устига бориб қолмаса. Чунки бу ҳокимдан қуйида бошқа ҳаммани мавжуд ҳолат қониқтиради», — дея ёзган у.
Аввалроқ, Андижон вилояти Марҳамат туманидаги 42-мактабнинг аёл ўқитувчилари синфхоналарни ремонт қилаётгани акс этган видеолар тарқалганди. Шундан сўнг мактаб директори ишдан олинган ва у устозлар «мажбурий меҳнатга жалб қилингани учун» 41 млн сўм жаримага тортилган.