Туркия Ташқи ишлар вазири Хоқон Фидан Исроил билан савдо-иқтисодий алоқаларни бутунлай узганини ва Туркия ҳаво ҳудудини Исроил самолётлари учун ёпиб қўйганини эълон қилди. Бу ҳақда «The Jerusalem Post» нашри хабар бермоқда.
Нашр маълумотларига кўра, бу қадамнинг оқибатлари ҳали тўлиқ баҳоланмаган бўлса-да, Туркия устидан парвозларга қўйилган чеклов Исроилдан Грузия ва Озарбайжонга бўлган парвозлар давомийлигини қарийб икки соатга узайтириши мумкин. Исроиллик расмийлардан бири нашрга берган изоҳида, Анқара илгари ҳам шундай баёнотлар берганини, бироқ икки мамлакат ўртасидаги иқтисодий алоқалар давом этаверганини таъкидлади.
Туркия Ташқи ишлар вазири, шунингдек, Анқара Исроилга қурол-яроғ ташиётган кемаларнинг Туркия портларига киришини ман этганини маълум қилди.
«The Jerusalem Post» нашрининг таъкидлашича, Туркиянинг бу қарори мамлакат порт маъмурларининг янги норасмий талаблари ҳақидаги хабарлар замирида қабул қилинган. Ушбу маълумотларга кўра, кема компанияларидан кемалар Исроил билан алоқадор эмаслиги ва бу мамлакатга жўнатилаётган ҳарбий ёки хавфли юкларни ташимаётганлиги ҳақида ёзма кафолат талаб қилина бошланган.
Бугун, 29 август куни Туркия парламентининг фавқулодда йиғилишида сўзга чиққан Фидан, Анқара Исроилнинг БМТ Бош ассамблеяси ишидаги иштирокини бутунлай тўхтатишга эришиш учун бир гуруҳ ҳамфикр давлатлар билан ҳамкорликни давом эттиришини таъкидлади.
«Биз фикрдош мамлакатлар билан ҳамкорликда Исроил билан савдони тўхтатиш, Исроилнинг БМТ Бош Ассамблеясидаги иштирокини бутунлай тўхтатиш, Исроилга қурол-аслаҳа ва ўқ-дорилар етказиб беришни тўхтатиш бўйича чора-тадбирларни давом эттирамиз», — дея унинг сўзларини Туркия оммавий ахборот воситалари келтирмоқда.
Фидан Анқаранинг дипломатик саъй-ҳаракатлари икки асосий йўналишга қаратилганини таъкидлади: Ғазодаги жанглар ва геноцидни дарҳол тўхтатиш ҳамда анклавга инсонпарварлик ёрдамини етказиб бериш. Иккинчи устувор вазифа сифатида Фаластин давлатини барпо этиш ғоясини халқаро кун тартибида сақлаб қолиш ва бу ташаббусга кенг қўллаб-қувватлашни таъминлашни тилга олди. Вазирнинг айтишича, Исроилнинг халқаро ҳуқуқни менсимаслиги ва Фаластинга нисбатан қатъий сиёсатини давом эттириши минтақада ҳам, ундан ташқарида ҳам жиддий оқибатларга олиб келиши муқаррар.