АҚШ президенти Доналд Трамп Венесуэла президенти Николас Мадурони ағдариш учун наркотрафикка қарши амалиётдан ниқоб сифатида фойдаланиши мумкин. Бу ҳақда Axios нашри Америка маъмуриятидаги манбаларига таяниб хабар берди.
Маълумотларга кўра, Венесуэла қирғоқлари сари 4500 нафар ҳарбий билан 7 та ҳарбий кема юборилган. Улар орасида 3 та ракета бошқарувига эга эскадрон мина ташувчи кема ва камида битта сув ости кемаси ҳам бор. Гуруҳнинг 2200 нафарини денгиз пиёдалари ташкил этиб, бу наркотрафик амалиётлари учун ноодатий кўрсаткич ҳисобланади.
Трамп маъмуриятидаги манбалар операция ҳақиқатан ҳам наркотерроризмга қарши йўналтирилганини таъкидламоқда. Аммо улардан бири шундай дейди: «Агар Мадуро ҳокимиятдан кетса, ҳеч ким йиғламайди». АҚШ расмийлари уни «қочқин наркобошлиқ» деб атайди.
Ҳукумат манбалари бундан аввалги 1989 йилдаги Панама операцияси билан параллел келтиради. Ўшанда Америка қўшинлари президент Норйегани ҳибсга олган эди. Манбанинг таъкидлашича, Мадурони ҳокимиятда қолдириш «Жеффри Эпштейнни болалар боғчаси мудири қилиб тайинлаш билан баробар».
Вашингтон Мадурони қўлга олишга ёрдам берган шахсга 50 млн доллар мукофот ваъда қилган. Axios ёзишича, АҚШ Мадуронинг атрофидаги ҳарбийлар уни ўзлари ағдаришга уриниши мумкинлигини ҳам ҳисобга олмоқда.
Бироқ ҳозирча тўлиқ ҳарбий босқин эҳтимоли паст баҳоланмоқда. Яқин ҳафталарда Америка денгиз кучлари наркотик олиб ўтаётган деб гумон қилинган кемаларни тўхтатишни бошлаши кутилаяпти. Айрим кемалар йўқ қилиниши мумкин.
Шунингдек, АҚШ ҳаво ҳужумлари ҳақида ҳам ўйлаяпти. Нишон сифатида кока плантациялари, наркотик картеллари базалари ва Россия томонидан яқинда қурилган ўқ-дорилар заводи кўрсатилаяпти. Айрим маслаҳатчилар Мадуронинг ўзи ҳам дрон зарбаси билан йўқ қилиниш эҳтимолини рад этмаяпти.
Мадуро бу ҳаракатларни «ҳарбий террористик ҳужумга тайёргарлик», деб атади. Унинг сўзларига кўра, бу ҳаракатлар «ахлоқсизлик, жинояткорона ва ноқонуний»дир. Колумбия президенти Густаво Петро ҳам Мадурони қўллаб-қувватлади ва «АҚШ Венесуэла нефтини эгаллаш ниятида», дея таъриф берди.