Туркия Исроил билан барча савдо ва иқтисодий муносабатларни тўхтатишга қарор қилди. Бу ҳақда мамлакат ташқи ишлар вазири Хоқон Фидан Anadolu агентлигига маълум қилди.
Унга кўра, Туркия Исроил фуқаролик ва ҳарбий самолётлари учун ҳаво ҳудудини ёпди, шунингдек, турк портлари орқали Исроилга йўлланган юклар — жумладан, қурол ва ўқ-дорилар билан тўлдирилган контейнерлар учун ҳам йўлни беркитди.
Фиданнинг сўзларига кўра, ушбу қарор Исроилнинг Ғазо секторидаги ҳаракатлари, шунингдек, Сурия, Яман ва Ливан ҳудудларига уюштирган ҳаво зарбаларига жавоб тариқасида қабул қилинган.
«Биз 52 давлат иштирокида БМТда Исроил ҳарбий машинасини қўллаб-қувватлаётган қурол-аслаҳа етказиб беришни тўхтатишга қаратилган йирик ташаббусни бошладик», — деди Фидан.
У Исроил ҳукумати сиёсатини «инсониятга қарши ирқий режим» деб атади ва ҲАМАСга қарши ҳарбий операцияни «геноцид» деб баҳолади. Шунингдек, Исроилнинг Жўлан тепаликларини босиб олишини ва Дамашқка зарба беришини қамраб олган ҳарбий ҳаракатларини кескин қоралади.
Туркиянинг бу қароридан сўнг 2023 йилда 6,8 млрд бўлган икки давлат ўртасидаги умумий товар айирбошлаш жиддий пасайиши кутилмоқда.