Россия Федерацияси яқин вақт ичида Самарқанд шаҳрида ўзининг Бош консуллигини очади. Бу ҳақда Москвадаги Ўзбекистон элчихонасида мустақиллик куни муносабати билан ўтказилган қабулда Россия ташқи ишлар вазири ўринбосари Сергей Рябков маълум қилди.
Рябковнинг айтишича, консуллик ташкил этиш бўйича ишлар якунланмоқда ва у яқин кунларда иш бошлайди. «Бу қадам икки томонлама муносабатларни, жумладан, минтақавий ҳамкорликни чуқурлаштиришга бўлган ўзаро интилишни яна бир бор тасдиқлайди», — деди дипломат.
Генконсуллик очилиши орқали Россия ўз фуқаролари учун Самарқанд ва унинг атрофида консуллик хизматларидан фойдаланишни енгиллаштирмоқчи. Бу ерда россиялик ҳамюртлар сони нисбатан кўплиги ҳисобга олинган.
Мазкур қарор 2024 йил февралда Россия Бош вазири Михаил Мишустин томонидан имзоланган расмий ҳужжатга асосан амалга оширилмоқда. Ҳужжатда Самарқанд шаҳрида Россия Федерацияси Генераль консуллигини ташкил этиш белгиланган.
Айни пайтда Ўзбекистонда Россиянинг Тошкентда элчихонаси ва Бухородаги консуллик бўлими фаолият юритмоқда. Самарқандда янги консуллик очилиши икки мамлакат ўртасидаги дипломатик алоқаларни янада мустаҳкамлашга хизмат қилади.
Самарқандда айни дамда Туркия, Франция ва Қозоғистоннинг бош консулликлари фаолият кўрсатмоқда.